സുകുമാരന്റെ മൂത്രത്തില്‍ ഉണ്ടായ പൗരുഷമെങ്കിലും കാണിക്കണം ; പൃഥ്വിരാജിനെ അധിക്ഷേപിച്ച് ജനം ടി വി എഡിറ്റര്‍: പ്രതിഷേധം രൂക്ഷമായപ്പോള്‍ ലേഖനം നീക്കി
ലക്ഷദ്വീപ് അഡ്മിന്‌സ്‌ട്രേറ്ററുടെ അധിനിവേശ നീക്കത്തില്‍ പ്രതിഷേധിച്ച നടന്‍ പൃഥ്വിരാജിനെ അധിക്ഷേപിച്ച് ജനം ടി വി എഡിറ്ററുടെ ലേഖനം. സുകുമാരന്റെ മൂത്രത്തില്‍ ഉണ്ടായ പൗരുഷമെങ്കിലും പൃഥ്വിരാജ് കാണിക്കണമെന്നും രാജ്യവിരുദ്ധ ശക്തികള്‍ക്കൊപ്പം പൃഥ്വിരാജ് കുരച്ചുചാടുമ്പോള്‍ നല്ല നടനായ സുകുമാരനെ ആരെങ്കിലും ഓര്‍മ്മിപ്പിച്ചാല്‍ അത് പിതൃസ്മരണയായിപ്പോകു”മെന്നുമായിരുന്നു ജനം ടി വിയുടെ ഓണ്‍ലൈനില്‍ പ്രസിദ്ധീകരിച്ച ലേഖനത്തില്‍ പറഞ്ഞത്. ചാനലിന്റെ എഡിറ്റര്‍ ജി കെ സുരേഷ് ബാബു എഴുതിയ ലേഖനത്തിലായിരുന്നു പരാമര്‍ശങ്ങള്‍.’പൃഥ്വിരാജിന്റെ കണ്ണീര്‍ വീണ്ടും ജിഹാദികള്‍ക്കു വേണ്ടി’ എന്നായിരുന്നു ലേഖനത്തിന്റെ തലക്കെട്ട്. സമൂഹ്യമാധ്യമങ്ങളില്‍ വിമര്‍ശനം ഉയര്‍ത്തിയതോടെ ലേഖനം സൈറ്റില്‍ നിന്ന് നീക്കി.
ലക്ഷദ്വീപിലെ ജനങ്ങള്‍ക്ക് പിന്തുണ നല്‍കി പൃഥ്വിരാജ് രംഗത്ത് എത്തിയിതോടെ പൃഥ്വിരാജിനു നേരെ സംഘ പരിവാറിന്റെ കടുത്ത സൈബര്‍ ആക്രമണം ഉണ്ടായിരുന്നു. അതിനു പിന്നാലെയായിരുന്നു ജനം ടി വി അധിക്ഷേപ ലേഖനം. പൃഥ്വിക്ക് പിന്തുണയും ജനം ടി വിക്കെതിരെ പ്രതിഷേധവുമായി നിരവധി പേര് രംഗത്ത് എത്തിയിരുന്നു. സംവിധായകരായ അരുണ്‍ ഗോപി, മിഥുന്‍ മാനുവല്‍ തോമസ്, നടന്മാരായ അജു വര്‍ഗീസ്, ആന്റണി വര്‍ഗീസ്, മുന്‍ എം എല്‍ എ വി ടി ബല്‍റാം തുടങ്ങിയവര്‍ സാമൂഹ്യ മാധ്യമങ്ങളില്‍ പ്രതിഷേധ കുറിപ്പുകള്‍ എഴുതി.
‘സംസ്‌കാരം എന്ന വാക്കിന്റെ ഏതെങ്കിലും അരികിലൂടെ നിങ്ങള്‍ സഞ്ചരിച്ചിട്ടുണ്ടെങ്കില്‍, ഈ വാചകങ്ങള്‍ നിങ്ങള്‍ തിരുത്തണ്ട, കാരണം നിങ്ങളില്‍ നിന്നു ഇതല്ലാതെ എന്ത് പ്രതീക്ഷിക്കാന്‍. പക്ഷെ ജനം എന്ന പേര് നിങ്ങള്‍ തിരുത്തണം..! ഈ വിസര്‍ജ്ജ്യം പേറുന്ന മനസ്സുകളുടെ ചാനലിന് ആ പേര് യോജിക്കില്ല, ലക്ഷദ്വീപിലെ ‘ജന’ത്തിനൊപ്പം’ -എന്നായിരുന്നു അരുണ്‍ ഗോപിയുടെ പ്രതികരിച്ചത്.
