ഇ ശ്രീധരനെ ബിജെപിയുടെ മുഖ്യമന്ത്രി സ്ഥാനാര്ത്ഥിയായി പ്രഖ്യാപിച്ചിട്ടില്ല: വി മുരളീധരന്
മെട്രോമാന് ഇ ശ്രീധരൻ കേരളത്തിൽ ബിജെപിയുടെ മുഖ്യമന്ത്രി സ്ഥാനാര്ത്ഥിയാണെന്ന സംസ്ഥാന അധ്യക്ഷന് കെ സുരേന്ദ്രന്റെ പ്രഖ്യാപനത്തെ തിരുത്തി കേന്ദ്രമന്ത്രി വി മുരളീധരന്. ഇ ശ്രീധരനെ ബിജെപി കേരളത്തിലെ മുഖ്യമന്ത്രി സ്ഥാനാര്ത്ഥിയായി പ്രഖ്യാപിച്ചതായി മാധ്യമ റിപ്പോര്ട്ടുകള് കണ്ടു. എന്നാല് പാര്ട്ടി അധ്യക്ഷനുമായി താന് സംസാരിച്ചിരുന്നു. അദ്ദേഹം അത്തരത്തിലൊരു പ്രസ്താവനയും നടത്തിയിട്ടില്ലെന്ന് പറഞ്ഞു.
സംസ്ഥാനത്തെ ചില പ്രശ്നങ്ങള് താന് ചൂണ്ടിക്കാട്ടുകയാണ് ഉണ്ടായത്. അതിനെ ഒരു പ്രഖ്യാപനമായി കണക്കാക്കരുതെന്നും കെ സുരേന്ദ്രന് പറഞ്ഞതായി വി മുരളീധരന് അറിയിച്ചു. ഈ രീതിയില് ഒരു പ്രഖ്യാപനവും നടത്തിയിട്ടില്ലെന്ന് കെസുരേന്ദ്രന് തന്നെ അറിയിച്ചെന്നും വാര്ത്താ ഏജന്സിയായ എഎന്ഐയോട് മുരളീധരന് പറഞ്ഞു.അതേസമയം, ഇ ശ്രീധരനാണ് കേരളത്തില് ബിജെപിയുടെ മുഖ്യമന്ത്രി സ്ഥാനാര്ത്ഥി എന്ന് കെ സുരേന്ദ്രന് ഇന്ന് രാവിലെ മാധ്യമങ്ങളോട് പറഞ്ഞിരുന്നു.