യു.എസിലെ വോവറ്റോസ മേഫെയർ മാളിൽ വെടിവയ്പ്പ്; എട്ടുപേർക്ക് പരിക്ക്
21 November 2020
യു.എസിലെ വിസ്കോസിനിൽ ഷോപ്പിങ് മാളിലുണ്ടായ വെടിവെപ്പിൽ എട്ടുപേർക്ക് പരിക്കേറ്റു. അക്രമിക്കായി തിരച്ചിൽ തുടരുകയാണ്.
വോവറ്റോസ മേഫെയർ മാളിൽ വെടിവെപ്പ് ഉണ്ടായതായും ഉടൻതന്നെ ഉദ്യോഗസ്ഥർ സ്ഥലത്തെത്തിയതായും എഫ്.ബി.ഐയും മിൽവോട്ടി കൗണ്ടി ഷെരീഫിന്റെ ഓഫിസും ട്വീറ്റ് ചെയ്തു. 20നും 30നും ഇടയിൽ പ്രായമുള്ള പുരുഷനാണ് ആക്രമണം നടത്തിയതെന്ന് പൊലീസ് തിരിച്ചറിഞ്ഞു. അക്രമണം അരങ്ങേറുമ്പോൾ മാളിലുണ്ടായിരുന്ന ജീവനക്കാർ ആ കെട്ടിടത്തിനുള്ളിൽ അഭയം തേടുന്ന വിഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്
സുരക്ഷ ഉദ്യോഗസ്ഥർ സ്ഥലത്തെത്തുന്നതിന് മുമ്പ് അക്രമി കടന്നുകളഞ്ഞതായും പരിക്കേറ്റ എട്ടുപേരെയും ആശുപത്രിയിലെത്തിച്ചതായും പൊലീസ് അറിയിച്ചു. ആരുടെയും പരിക്ക് ഗുരുതരമല്ലെന്നാണ് വിവരം.
