പ്രതിയെ രക്ഷപ്പെടാൻ സഹായിച്ചു, കൊലപാതകം മറച്ചുവച്ചു: കായംകുളത്ത് സിപിഎം നേതാവിനെ കൊലപ്പെടുത്തിയ സംഭവത്തിൽ കോൺഗ്രസ് കൗൺസിലർ അറസ്റ്റിൽ
കായംകുളത്ത് സിപിഎം നേതാവ് സിയാദിനെ കൊലപ്പെടുത്തിയ കേസിൽ കോൺഗ്രസ് കൗൺസിലർ അറസ്റ്റിലായി. നഗരസഭ കൗൺസിലർ കാവിൽ നിസാം ആണ് അറസ്റ്റിലായത്. പ്രതിയെ രക്ഷപ്പെടുവാൻ സഹായിച്ചു, കൊലപാതകം മറച്ചുവച്ചു എന്നീ കുറ്റങ്ങളാണ് നിസാമിനെതിരെ ചുമത്തിയിരിക്കുന്നത്്
കൊലപാതകത്തിന് പിന്നിൽ നാലംഗ കൊട്ടേഷൻ സംഘമാണെന്ന് കായംകുളം പൊലീസ് വ്യക്തമാക്കിയിരുന്നു. കൊലപാതകം നടത്തിയ ശേഷം മുഖ്യപ്രതി മുജീബിനെ ബൈക്കിൽ രക്ഷപ്പെടാൻ സഹായിച്ചത് കാവിൽ നിസാമാണെന്ന് പൊലീസ് പറഞ്ഞു. കുറ്റകൃത്യം നടന്നത് അറി‍ഞ്ഞിട്ടും നിസാം പൊലീസിൽ അറിയിച്ചില്ലെന്നും അന്വേഷണ സംഘം വ്യക്തമാക്കി.
റോഡരികിൽ സുഹൃത്തുക്കളുമായി സംസാരിച്ചു നിന്ന സിപിഎം നേതാവ് സിയാദിനെ (35) ബൈക്കിലെത്തിയ വെറ്റ മുജീബ് രണ്ട് തവണ കഠാര കൊണ്ട് കുത്തുകയായിരുന്നു. കുത്തുകൊണ്ട് നിലത്തുവീണ സിയാദിനെ നാട്ടുകാരും സുഹൃത്തുക്കളും ഉടനടി കായംകുളം ഗവ. താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
