പ്ലസ് വൺ ഏകജാലക പ്രവേശനം; ആഗസ്റ്റ് 20 വരെ അപേക്ഷിക്കാം
പത്താം ക്ലാസ് പാസായവര്ക്ക് സംസ്ഥാനത്ത് പ്ലസ് വൺ ഏകജാലക പ്രവേശനത്തിനായി അപേക്ഷ സമര്പ്പിക്കാനുള്ള തിയതി ആഗസ്റ്റ് 14ൽ നിന്ന് 20 വരെ നീട്ടി. മുന്നോക്കക്കാരിലെ പിന്നാക്കക്കാർക്ക് പത്ത് ശതമാനം സംവരണം ഏർപ്പെടുത്തി സർക്കാർ ഉത്തരവ് ഇറങ്ങിയ സാഹചര്യത്തിലാണ് പുതിയ തീരുമാനം.
അതേസമയം പ്രവേശന ഷെഡ്യൂളിലും മാറ്റം വരുത്തിയിട്ടുണ്ട്. അപേക്ഷകള് ലഭിച്ചുകഴിഞ്ഞാല് സെപ്റ്റംബർ 7നാണ് ഒന്നാം അലോട്ട്മെന്റ് നടക്കുക. പിന്നീടുള്ള ട്രയൽ അലോട്ട്മെൻറ് 24 ലേക്ക് നീട്ടുകയും ചെയ്തു. അടുത്ത മാസം 29ന് മുഖ്യ അലോട്ട്മെൻറ് അവസാനിക്കും.
അതിന് ശേഷമുള്ള സപ്ലിമെൻററി അലോട്ട്മെൻറ് ഒക്ടോബർ മൂന്നുമുതൽ 23 വരെയായിരിക്കും. ഒക്ടോബർ 23നായിരിക്കും പ്രവേശനം അവസാനിപ്പിക്കുക. സര്ക്കാര് ഉത്തരവിലെ പുതിയ സംവരണത്തിനനുസൃതമായി പ്രവേശന പ്രോസ്പെക്ടസിലും മാറ്റം വരുത്തിയിട്ടുണ്ട്. ഇത് പ്രകാരം പ്രോസ്പെക്ടസിന്റെ അനുബന്ധം ഒന്ന് മാതൃകയിലുള്ള സർട്ടിഫിക്കറ്റ് അല്ലെങ്കിൽ അനുബന്ധം രണ്ട് മാതൃകയിലുള്ള ഇൻകം ആൻഡ് അസറ്റ്സ് സർട്ടിഫിക്കറ്റ് വില്ലേജ് ഓഫിസുകളിൽനിന്ന് നേടുന്നവർക്കാകും സംവരണത്തിനുള്ള അർഹത ഉണ്ടായിരിക്കുക. കൂടുതല് വിവരങ്ങള് www.hscap.kerala.gov.in ൽ ലഭ്യമാണ്.