അമിത് ഷായ്ക്ക് കൊവിഡ് മുക്തി
9 August 2020
അഭ്യന്തരമന്ത്രി അമിത് ഷാ കൊവിഡ് മുക്തി നേടിയതായി ബിജെപി വൃത്തങ്ങൾ വ്യക്തമാക്കി. അവസാനം നടത്തിയ കൊവിഡ് പരിശോധനയിൽ അമിത് ഷായുടെ ഫലം നെഗറ്റീവായെന്ന വിവരം പുറത്തു വിട്ടത് ബിജെപി നേതാവും എംപിയുമായ മനോജ് തിവാരിയാണ്. 55-കാരനായ അമിത് ഷാ പ്രമേഹരോഗി കൂടിയായതിനാൽ അദ്ദേഹത്തിന് കർശന നിരീക്ഷണമാണ് ആശുപത്രിയിൽ ഏർപ്പെടുത്തിയത്. കൊവിഡ് പോസിറ്റീവാക്കുന്നതിന് മുൻപ് അദ്ദേഹം കേന്ദ്രമന്ത്രിസഭായോഗത്തിൽ പങ്കെടുത്തത് ആശങ്ക സൃഷ്ടിച്ചിരുന്നു.
കൊവിഡ് സ്ഥിരീകരിച്ചതിനെത്തുടർന്ന് അമിത് ഷാ അയോധ്യയിൽ എത്തിയിരുന്നില്ല .ഒരാഴ്ച മുൻപാണ് അമിത് ഷാ കൊവിഡ് പോസിറ്റീവായത്. താനുമായി സമ്പർക്കത്തിൽ വന്നവരെല്ലാം സ്വയം നിരീക്ഷണത്തിൽ പോകണമെന്ന് അമിത് ഷാ ആവശ്യപ്പെട്ടിരുന്നു. ദില്ലി അതിർത്തിയോട് ചേർന്ന് ഗുരുഗ്രാമിലെ മേദാന്ത ആശുപത്രിയിലാണ് അമിത് ഷായെ പ്രവേശിപ്പിച്ചത്.