ആര്എസ്എസിനും ബിജെപിക്കുമെതിരേ ഉറച്ച നിലപാട് സ്വീകരിച്ച രാജ്യത്തെ ഏക രാഷ്ട്രീയ പ്രസ്ഥാനം കോണ്ഗ്രസ് മാത്രം: ഉമ്മൻ ചാണ്ടി
ഇന്ത്യയില് ആര്എസ്എസിനും ബിജെപിക്കുമെതിരേ എല്ലാകാലത്തും ഉറച്ച് നിലപാട് സ്വീകരിച്ച ഏക രാഷ്ട്രീയ പ്രസ്ഥാനം കോണ്ഗ്രസ് മാത്രമാണെന്ന യാഥാര്ത്ഥ്യം സിപിഎം സംസ്ഥാന സെക്രട്ടറി കോടിയേരി മറക്കരുത് എന്ന് മുന് മുഖ്യമന്ത്രി ഉമ്മന് ചാണ്ടി. നിലവില് അഴിമതിയിലും സ്വര്ണക്കടത്തു കേസിലും മുഖം നഷ്ടപ്പെട്ട പിണറായി സര്ക്കാരിന്റെ ദയനീയാവസ്ഥയില് നിന്നു ജനശ്രദ്ധ തിരിച്ചുവിടാനുള്ള വില കുറഞ്ഞ തന്ത്രത്തിന്റെ ഭാഗമാണ് പ്രതിപക്ഷ നേതാവ് രമേശ് ചെന്നിത്തലയ്ക്കെതിരായ കോടിയേരി ബാലകൃഷ്ണന്റെ പ്രസ്താവനയെന്ന് അദ്ദേഹം ആരോപിച്ചു.
അതേപോലെ തന്നെ വിദ്യാര്ത്ഥി ജീവിതകാലം മുതല് കോണ്ഗ്രസിന്റെ മതേതര ആശയങ്ങള് ഉള്ക്കൊണ്ട് പ്രവര്ത്തിച്ച രമേശ് ചെന്നിത്തലയ്ക്ക് എകെജി സെന്ററില് നിന്നുള്ള സര്ട്ടിഫിക്കറ്റ് ആവശ്യമില്ലെന്നും ഉമ്മൻ ചാണ്ടി പറയുകയുണ്ടായി. കേരളത്തില് അടുത്ത കാലത്ത് സ്പ്രിംഗ്ളര്, ബെവ്കോ, ഇ മൊബിലിറ്റി അഴിമതികള് പുറത്തുകൊണ്ടുവന്ന പ്രതിപക്ഷ നേതാവിനോടുള്ള സിപിഎമ്മിന്റെ പക മനസിലാക്കാവുന്നതേയുള്ളു.
വാര്ത്താ സമ്മേളനത്തില് സംസ്ഥാനത്തെ പ്രതിപക്ഷ നേതാവിനെ പരിഹസിച്ചു പ്രശ്നങ്ങളില് നിന്ന് ഒളിച്ചോടുന്ന മുഖ്യമന്ത്രിയുടെ തന്ത്രവും ജനങ്ങള്ക്കു മനസിലാകുമെന്നും ഉമ്മന് ചാണ്ടി പറഞ്ഞു.