വര്ഗീയ പ്രചരണത്തിന് ഉപയോഗിക്കുന്നു; പ്രത്യേക വിവാഹ നിയമപ്രകാരം വിവാഹിതരാകുന്നവരുടെ നോട്ടീസ് ഇനിമുതല് വെബ് സൈറ്റില് പ്രസിദ്ധീകരിക്കില്ല
കേരളത്തിൽ ഇനിമുതൽ പ്രത്യേക വിവാഹ നിയമപ്രകാരം വിവാഹ ഉദ്യോഗസ്ഥന് സമര്പ്പിക്കുന്ന വിവാഹ നോട്ടീസ് രജിസ്ട്രേഷന് വകുപ്പിന്റെ വെബ് സൈറ്റില് പ്രസിദ്ധീകരിക്കില്ല. ഇതുസംബന്ധിച്ച നിർദ്ദേശം നല്കിയതായി പൊതുമരാമത്ത്, രജിസ്ട്രേഷന് മന്ത്രി ജി സുധാകരന് അറിയിച്ചു.
നിലവിൽ ഇത്തരത്തിൽ പ്രസിദ്ധീകരിക്കുന്ന നോട്ടീസുകള് വകുപ്പിന്റെ വെബ്സൈറ്റില് നിന്ന് ഡൗണ്ലോഡ് ചെയ്ത് വര്ഗീയ പ്രചരണത്തിന് ഉപയോഗിക്കുന്നതായി പരാതികള് ലഭിച്ചതിനെ തുടര്ന്നാണ് ഇപ്പോഴത്തെ നടപടിയെന്ന് മന്ത്രി പറഞ്ഞു.
മുൻപ് ഉണ്ടായിരുന്ന വിവാഹ നോട്ടീസുകള് രജിസ്ട്രേഷന് വകുപ്പിന്റെ വെബ്സൈറ്റില് പ്രസിദ്ധീകരിക്കുന്ന രീതിക്ക് പകരം നോട്ടീസ് അപേക്ഷകരുടെ വാസസ്ഥലം ഉള്പ്പെടുന്ന സബ് രജിസ്ട്രാര് ഓഫീസുകളുടെ നോട്ടീസ് ബോര്ഡുകളില് മാത്രം പ്രസിദ്ധീകരിച്ചാല് മതിയാകുന്നതാണ് പുതിയ നിർദ്ദേശം.
സംസ്ഥാനത്ത് 1954ല് നിലവില് വന്ന പ്രത്യേക വിവാഹ നിയമപ്രകാരം വിവാഹിതരാകുവാന് ആഗ്രഹിക്കുന്നവര് നിയമാനുസരമുള്ള നോട്ടീസ് വിവാഹ ഓഫീസര്ക്ക് സമര്പ്പിക്കേണ്ടതാണ്. ഇത് പ്രകാരം ലഭിക്കുന്ന നോട്ടീസ് വിവാഹ നിയമത്തിന്റെ ബന്ധപ്പെട്ട വകുപ്പുകള് പ്രകാരം ബന്ധപ്പെട്ട ഓഫീസുകളില് പ്രധാനപ്പെട്ട സ്ഥലങ്ങളില് പൊതുജനശ്രദ്ധയ്ക്കായും വിവാഹം സംബന്ധിച്ച് നിയമപരമായ എതിര്പ്പുണ്ടെങ്കില് ആയത് സമര്പ്പിക്കുന്നതിനുമായി പ്രദര്ശിപ്പിച്ച് വരുന്നുണ്ട്.
പിന്നീട് 2018ലെ പ്രത്യേക വിവാഹ നിയമത്തിന്റെ ചട്ടങ്ങളില് ഭേദഗതി വരുത്തി അപേക്ഷകരുടെ ഫോട്ടോകള് കൂടി ഉള്പ്പെടുത്തുന്നതിന് തീരുമാനിച്ചിരുന്നു. നിലവില് പ്രത്യേക നിയമപ്രകാരമുള്ള വിവാഹങ്ങള് ഉള്പ്പെടെ രജിസ്ട്രേഷന് വകുപ്പിലെ സേവനങ്ങള് ഓണ്ലൈന് സേവനങ്ങളായി മാറിയതോട് കൂടി ഫോട്ടോയും മേല്വിലാസവും സഹിതമുള്ള വിവാഹ നോട്ടീസുകള് 2019 മുതല് രജിസ്ട്രേഷന് വകുപ്പിന്റെ വെബ്സൈറ്റില് പ്രസിദ്ധീകരിച്ചു വരുന്നുണ്ട്.