ഇന്ത്യന്‍ അതിർത്തിയിൽ ചൈന കടന്നുകയറിയിട്ടില്ല; നമ്മുടെ സൈന്യം ചൈനയ്ക്ക് ശക്തമായ മറുപടി നല്‍കി: പ്രധാനമന്ത്രി
രാജ്യത്തിന്റെ മണ്ണ് ആർക്കും വിട്ടു കൊടുക്കില്ലെന്ന് പ്രധാനമന്ത്രി നരേന്ദ്രമോദി. കഴിഞ്ഞ ദിവസം അതിർത്തിയിൽ ഉണ്ടായ ഇന്ത്യാ-ചൈന പ്രശ്നം ചർച്ച ചെയ്യാൻ വിളിച്ചുചേർത്ത സർവ്വകക്ഷിയോഗത്തിലാണ് ഇന്ത്യയുടെ ഒരിഞ്ച് ഭൂമി പോലും മറ്റാരുടെയും കയ്യിലില്ല എന്ന് പ്രധാനമന്ത്രി പറഞ്ഞത്. നമ്മുടെ അതിർത്തിയിൽ ചൈന കടന്നുകയറുകയോ ഒരു സൈനിക പോസ്റ്റിൽ പോലും അവർ അധീശത്വം സ്ഥാപിക്കുകയോ ചെയ്തിട്ടില്ല. ചൈനയ്ക്ക് നമ്മുടെ സൈന്യം ശക്തമായ മറുപടി നല്‍കി.” – പ്രധാനമന്ത്രി പറഞ്ഞു.
അതേസമയം അതിർത്തിയിൽ ചൈനീസ് കടന്നുകയറ്റം ഉണ്ടായോ എന്ന് സർക്കാർ വ്യക്തമാക്കണമെന്ന് കോൺഗ്രസ് അധ്യക്ഷ സോണിയാ ഗാന്ധി യോഗത്തിൽ ആവശ്യപ്പെട്ടിരുന്നു. ഇന്ത്യയുടെ ഭാഗത്തുനിന്നും രഹസ്യാന്വേഷണ വീഴ്ചയില്ലെന്ന് പ്രതിരോധ മന്ത്രി രാജ്നാഥ് സിംഗ് പറഞ്ഞു. നിലവിലുള്ള ഇന്ത്യാ- ചൈന തർക്കം ചർച്ചയിലൂടെ തീർക്കണമെന്നായിരുന്നു സിപിഎം ജനറൽ സെക്രട്ടറി സീതാറാം യെച്ചൂരി യോഗത്തിൽ ആവശ്യപ്പെട്ടത്.
