സംസ്ഥാനത്ത് എക്സെെസ് ഉദ്യോഗസ്ഥൻ കോവിഡ് ബാധിച്ചു മരിച്ചു
സംസ്ഥാനത്ത് ഒരു കോവിഡ് മരണം കൂടി. കണ്ണൂർ സ്വദേശി കെ.പി. സുനിൽ (28) ആണ് മരിച്ചത്. മട്ടന്നൂരിൽ എക്സൈസ് ഡ്രൈവറായിരുന്നു ഇയാൾ. കോവിഡ്-19 സ്ഥിരീകരിച്ച് പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ ചികിത്സയിൽ കഴിയുകയായിരുന്നു ഇയാൾ.
ഇതോടെ സംസ്ഥാനത്ത് കോവിഡ് ബാധിച്ചു മരിച്ചവരുടെ എണ്ണം 21 ആയി. മട്ടന്നൂർ എക്സൈസ് റേഞ്ച് ഓഫീസിൽ ഡ്രൈവറായ സുനിൽ കുമാറിനെ കോവിഡ് പിടിപെട്ടതെങ്ങനെയെന്ന് ഇതുവരെ വ്യക്തമായിട്ടില്ല. ഒരാഴ്ച മുമ്പ് റിമാൻഡ് പ്രതിയെയും കൊണ്ട് കണ്ണൂർ ജില്ലാ ആശുപത്രിയിലും തോട്ടടയിലെ നിരീക്ഷണ കേന്ദ്രത്തിലും ഇയാൾ പോയിരുന്നെങ്കിലും ഇവിടുന്നാണോ രോഗബാധയുണ്ടായെന്ന് ആരോഗ്യ വകുപ്പ് സ്ഥിരീകരിച്ചിട്ടില്ലെന്നാണ് റിപ്പോർട്ടുകൾ..
ഒരാഴ്ച മുമ്പ് തൊണ്ടവേദനയെത്തുടർന്ന് ഇരിക്കൂറിലെ സ്വകാര്യ ആശുപത്രിയിലും പിന്നീട് പനിയെ തുടർന്ന് കണ്ണൂരിലെ സ്വകാര്യ ആശുപത്രിയിലും ചികിത്സ തേടിയിരുന്നു. ഇവിടുന്ന് പനി മൂർച്ഛിച്ചതോടെ കഴിഞ്ഞ 14 നാണ് പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.