ഉത്പന്നങ്ങള്‍ ബഹിഷ്ക്കരിക്കുന്നതിനൊപ്പം ചൈനയെ വെറുക്കുക കൂടി ചെയ്യണം: ബാബാ രാംദേവ്

single-img
6 June 2020

ചൈനയിൽ നിന്നുള്ള ഉത്പന്നങ്ങള്‍ ഇന്ത്യക്കാർ ബഹിഷ്കരിക്കുക മാത്രമല്ല ചൈനയെ വെറുക്കുക കൂടി വേണമെന്ന ആവശ്യവുമായി യോഗ ഗുരുവും പതഞ്‌ജലി ഉത്‌പന്നങ്ങളുടെ മേധാവിയുമായ ബാബാ രാംദേവ്. ഇന്ത്യയുടെ നേരെ ചൈന നടത്തുന്ന പ്രവര്‍ത്തനങ്ങള്‍ എല്ലാം തന്നെ ഉപദ്രവകരമാണെന്നും ആജ് തകിന്‍റെ ഇ അജന്‍ഡയില്‍ സംസാരിക്കവേ അദ്ദേഹം പറഞ്ഞു. നമ്മുടെ രാജ്യത്തെ സ്നേഹിക്കുന്ന ഒരാള്‍ പോലും ചൈനീസ് ഉത്പന്നങ്ങള്‍ വാങ്ങില്ലെന്ന് പ്രതിജ്ഞ ചെയ്യണം.

ജവഹര്‍ലാല്‍ നെഹ്റു പ്രധാനമന്ത്രിയായ കാലം മുതല്‍ നമ്മള്‍ കേള്‍ക്കുന്നത് ചൈന നമ്മുടെ സഹോദരരാണ് എന്നാണ്. പക്ഷെ ഈ സഹോദര സങ്കല്‍പത്തിന് ഇടയില്‍ പല തവണയാണ് ചൈന നമ്മുടെ വയറില്‍ കത്തികയറ്റാന്‍ ശ്രമം നടത്തിയത്. ഇന്ത്യയിലേക്ക് നടത്തുന്ന കച്ചവടത്തിൽ നിന്നും ലഭിക്കുന്ന വരുമാനത്തില്‍ നിന്ന് ലഭിക്കുന്ന ലാഭം ഇന്ത്യയെ തന്നെ ദ്രോഹിക്കാനാണ് ഉപയോഗിക്കുന്നതെന്ന് ബാബാ രാംദേവ് പറയുന്നു.

അതേപോലെ തന്നെ പാകിസ്ഥാന് വേണ്ടിയും ചൈന പണം മുടക്കുന്നുണ്ടെന്നും ബാബാ രാംദേവ് ആരോപണം ഉന്നയിച്ചു. ഏതൊക്കെ രീതിയില്‍ വേണമെങ്കിലും ഇന്ത്യയെ ഉപദ്രവിക്കാന്‍ ചൈന എപ്പോഴും സജ്ജമാണ്. അതുകൊണ്ടുതന്നെ അമേരിക്കയ്ക്കും യൂറോപ്പിനുമൊപ്പം ചൈനയ്ക്കെതിരെ ഇന്ത്യ കൈ കോര്‍ക്കണമെന്നും ബാബാ രാംദേവ് ആവശ്യപ്പെടുന്നു.