നേപ്പാളിൽ കോവിഡ് രോഗികൾ വർദ്ധിക്കുന്നു: ബാധിച്ചവരിൽ ഭൂരിപക്ഷവും 40 വയസിന് താഴെ പ്രായമുള്ളവർ
23 May 2020
ഇന്ത്യയുടെ അയൽരാജ്യമായ നേപ്പാളിൽ കോവിഡ് ബാധിതരുടെ എണ്ണം ഉയരുന്നു. പുതിയതായി 32 കേസുകളാണ് റിപ്പോർട്ട് ചെയ്തത്. ഇതോടെ വൈറസ് ബാധ സ്ഥിരീകരിച്ചവരുടെ എണ്ണം 548 ആയതായി നേപ്പാൾ ആരോഗ്യമന്ത്രാലയം അറിയിച്ചു.
ശർലാഹിയിൽ 13 പേർക്കും രുപൻദേഹി, കപിൽവസ്ഥു എന്നീ ജില്ലകളിൽ എട്ടു പേർക്ക് വീതവും ബാര, കാഠ്മണ്ഡു, ചിത്വാൻ എന്നിവിടങ്ങളിൽ ഒരോരുത്തർക്ക് വീതവുമാണ് രോഗം ബാധിച്ചതെന്നും മന്ത്രാലയം വക്താവ് സമീർ കുമാർ അധികാരി പറഞ്ഞു.
രാജ്യത്ത് രോഗം ബാധിച്ച് ഇതുവരെ മൂന്നു പേരാണ് മരിച്ചത്. കോവിഡ് ബാധിച്ചവരിൽ 80 ശതമാനവും 40 വയസിന് താഴെ പ്രായമുള്ളവരാണെന്നുള്ളതാണ് ഇതിലെ ഗൗരവകരമായ വസ്തുത.