വീണ്ടും ആശ്വാസദിനം; സംസ്ഥാനത്ത് ഇന്ന് ആര്ക്കും കൊവിഡ് ഇല്ല
കേരളത്തിൽ ഇന്ന് ആർക്കും കോവിഡ്-19 സ്ഥിരീകരിച്ചിട്ടില്ലെന്ന് സംസ്ഥാന ആരോഗ്യ വകുപ്പ് മന്ത്രി കെകെ ശൈലജ ടീച്ചര് അറിയിച്ചു. കണ്ണൂര് ജില്ലയില് ചികിത്സയിലായിരുന്ന കാസർകോട് സ്വദേശിയുടെ പരിശോധനാഫലം നെഗറ്റീവായി രോഗമുക്തി നേടിയതോടെ 401 പേരാണ് ഇതുവരെ കോവിഡില് നിന്നുംമുക്തി നേടിയത്. അതേസമയം 95 പേരാണ് നിലവില് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്.അതേപോലെ വിവിധ ജില്ലകളിലായി 21,720 പേര് നിരീക്ഷണത്തിലാണ്.
ഇവരില് 21,332 പേര് വീടുകളിലും 388 പേര് ആശുപത്രികളിലും നിരീക്ഷണത്തിലാണ്.പുതുതായി 63 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. ഇതുവരെ 32,217 പേരുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതിൽ 31,611 സാമ്പിളുകളുടെ പരിശോധനാഫലം നെഗറ്റിവ് ആണ്.
ഇതിന് പുറമെ സെന്റിനല് സര്വൈലന്സിന്റെ ഭാഗമായി ആരോഗ്യപ്രവര്ത്തകര്, അതിഥി തൊഴിലാളികള്, സാമൂഹിക സമ്പര്ക്കം കൂടുതലുള്ള വ്യക്തികള് മുതലായ മുന്ഗണനാ ഗ്രൂപ്പുകളില് നിന്ന് 2391 സാമ്പിളുകള് ശേഖരിച്ചതില് ലഭ്യമായ 1683 സാമ്പിളുകള് നെഗറ്റീവ് ആയി. അതേപോലെ തന്നെ കേരളത്തിൽ ഇന്ന് 4 പുതിയ ഹോട്ട് സ്പോട്ടുകള് കൂടി ഉള്പ്പെടുത്തി.
വയനാട് ജില്ലയിലെ മാനന്തവാടി, എറണാകുളം ജില്ലയിലെ എടക്കാട്ടുവയല് പഞ്ചായത്ത്, മഞ്ഞള്ളൂര് പഞ്ചായത്ത്, ഇടുക്കി ജില്ലയിലെ ശാന്തന്പാറ പഞ്ചായത്ത് എന്നിവയാണ് പുതിയ ഹോട്ട് സ്പോട്ടുകള്. ഇവയുംകൂടി ചേർന്നതോടെ ഹോട്ട് സ്പോട്ടുകളുടെ എണ്ണം 84 ആയി.