കൊറോണക്കാലത്ത് വയനാട്ടിൽ കുടുങ്ങി ജോജു ജോർജ്; ലോക്ക് ഡൗൺ തീരുന്നതുവരെ അവിടെ തുടരുമെന്ന് താരം
കോറോണ വൈറസ് വ്യാപിച്ച സാഹചര്യത്തിൽ രാജ്യവ്യാപകമായി ലോക്ക് ഡൗൺ പ്രഖ്യാപിച്ചിരിക്കുകയാണ്. ജനങ്ങൾ പുറത്തിറങ്ങാതെ വീട്ടിൽ തന്നെയിരിക്കണമെന്നാണ് സർക്കാർ നൽകുന്ന നിർദേശം. ഈ സാഹചര്യത്തിൽ താൻ വയനാട്ടിൽ പെട്ടുപോയതായി ചലച്ചിത്രതാരം ജോജു ജോർജ് അറിയിച്ചു. ആയുർവേദ ചികിത്സയുടെ ഭാഗമായാണ് താൻ വയനാട്ടിലെത്തിയതെന്നും. വൈറസ് പടരുന്ന സാഹചര്യത്തിൽ യാത്രകൾ ഒഴിവാക്കിയതിനാൽ പിന്നെ നാട്ടിലേക്ക് മടങ്ങാനായില്ലെന്നും ജോജു പറയുന്നു.
എന്നാൽ ലോക്ക് ഡൗൺ തീരുന്നതുവരെ അവിടെ തുടരുമെന്നും.ജനങ്ങളെല്ലാവരും സർക്കാർ നൽകുന്ന നിർദേശങ്ങൾ പാലിക്കണമെന്മനും താരം പറയുന്നു.ഫെയ്സ്ബുക്ക് ലൈവിലൂടെയാണ് താരം പ്രതികരിച്ചത്. എല്ലാവരും ഒരുമിച്ചു നിൽക്കണമെന്നും താരം പറയുന്നു.
ജോജു ജോർജിന്റെ വാക്കുകൾ;
‘കഴിഞ്ഞ പത്തൊൻപത് ദിവസമായി ഞാൻ വയനാട്ടിലാണ്. കൊറോണ വിഷയം തുടങ്ങുന്നതിനു മുമ്പേ ഇവിടെയൊരു ആയുർവേദ കേന്ദ്രത്തിൽ എത്തിയതാണ്. തടികുറയുന്നതുമായി ബന്ധപ്പെട്ട ചികിത്സയ്ക്കാണ് വന്നത്. അതിനു ശേഷമാണ് ലോക്ഡൗൺ ഉണ്ടാകുന്നത്. ഞാൻ ഇവിടെ നിന്നു ഇതുവരെ പുറത്തിറങ്ങിയിട്ടില്ല. സർക്കാർ പറയുന്നതുവരെ ലോക്ഡൗൺ കാലവധി കഴിയുന്നതുവരെ ഇവിടെ തുടരാനാണ് തീരുമാനം.’
‘ഇതിനിടെ എന്റെ സുഹൃത്തുക്കളെയും ഞാൻ വിളിക്കുകയും അവർ എന്നെ വിളിക്കുകയും ചെയ്യുന്നുണ്ട്. നമുക്ക് പരിചയമുള്ളവരെയും സ്നേഹമുള്ളവരെയും പിണക്കമുള്ളവരെയും വിളിക്കണം, അവരെ ആശ്വസിപ്പിക്കണം. അതൊക്കെയാണ് ഈ സമയത്ത് നമുക്ക് ചെയ്യാനാകുക.’
‘ഈ പത്തൊൻപത് ദിവസമായി സിഗരറ്റ് വലിയോ കള്ളുകുടിയോ ഒന്നുമില്ല. അങ്ങനെ ഡിപ്രഷനിൽ ഇരിക്കുന്ന മറ്റ് ആളുകളെ അവരുടെ സുഹൃത്തുക്കള്‍ വിഡിയോ കോളോ മറ്റോ ചെയ്ത് അവരെ പിന്തുണയ്ക്കണം. ഇന്ത്യയ്ക്ക് പുറത്തുനിന്നു വരുന്നവരോടും സ്നേഹത്തോടു കൂടി പെരുമാറാൻ നമുക്ക് കഴിയണം. ഈ അസുഖം വന്നതിന്റെ പേരിൽ അവരെ കുറ്റപ്പെടുത്താൻ പാടില്ല. ഇത് കാലം തീരുമാനിച്ചതാണ്.’
‘വല്ലാത്തൊരു അവസ്ഥയിലൂടെയാണ് നമ്മുടെ നാട് മുന്നോട്ടുപോകുന്നത്. നമ്മളെല്ലാവരും ഒന്നിച്ച് നിൽക്കേണ്ട സമയം. സർക്കാർ പറയുന്ന തീരുമാനങ്ങൾ കേട്ട് അതനുസരിച്ച് പ്രവർത്തിക്കണം. ഇത് നമുക്ക് വേണ്ടി എടുക്കുന്ന തീരുമാനങ്ങളാണ്. എല്ലാവരും ഒരുമിച്ച് നിൽക്കുക. ഈ സമയവും കടന്നുപോകും.’
