വാളയാർ പീഡനക്കേസിൽ വെറുതെ വിട്ട പ്രതികളെ അറസ്റ്റ് ചെയ്യണമെന്ന് ഹൈകോടതി
കൊച്ചി: വാളയാറിൽ പീഡനത്തിനിരയായ പെൺകുട്ടികളുടെ മരണവുമായി ബന്ധപ്പെട്ട പ്രതികളെ അറസ്റ്റ് ചെയ്യാൻ ഹെെക്കോടതി ഉത്തരവ്. വിചാരണക്കോടതി വെറുതെ വിട്ട ആറ് പ്രതികളെയും ഉടൻ അറസ്റ്റ് ചെയ്യണമെന്നാണ് ഹൈകോടതി ഉത്തരവ്. പ്രതികളെ വിചാരണക്കോടതിയിൽ ഹാജരാക്കിയതിനു ശേഷം ജാമ്യത്തിൽ വിടണമെന്നും കോടതി നിർദേശിച്ചു.
പ്രതികളെ വെറുതെ വിട്ടതിനെതിരെ സംസ്ഥാന സർക്കാരും കുട്ടികളുടെ മാതാപിതാക്കളും നൽകിയ അപ്പീൽ പരിഗണിക്കവേയാണ് കോടതി ഇത്തരമൊരു നിർദേശം വെച്ചത്. അപ്പീലിൽ പ്രതികളെ കുറ്റക്കാരെന്ന് കണ്ടെത്തുന്ന സാഹചര്യമുണ്ടായാൽ പ്രതികൾ രക്ഷപ്പെടാൻ സാധ്യതയുണ്ട്. അത് ഒഴിവാക്കാൻ പ്രതികളെ അറസ്റ്റ് ചെയ്ത് ജയിലിലിടുകയോ ജാമ്യത്തിൽ വിടുകയോ ചെയ്യണമെന്ന അപേക്ഷ സംസ്ഥാന സർക്കാർ കോടതിയിൽ സമർപ്പിച്ചിരുന്നു.
ഇതേ തുടർന്നാണ് കോടതി പ്രതികൾക്കെതിരെ ബെയിലബൾ വാറൻറ് പുറപ്പെടുവിച്ചത്. അതനുസരിച്ചുള്ള നടപടികൾ ഇനി കേസിലുണ്ടാകും. മെയ് മാസത്തിലായിരുക്കും കേസ് ഇനി പരിഗണിക്കുക.