ആരോഗ്യ മന്ത്രിക്ക് മീഡിയാ മാനിയ;ഇമേജ് ബില്ഡിംഗ് അവസാനിപ്പിക്കണം, രൂക്ഷവിമര്ശനവുമായി രമേശ് ചെന്നിത്തല
തിരുവനന്തപുരം : ആരോഗ്യമന്ത്രി കെ കെ ശൈലജയെ രൂക്ഷമായി വിമര്ശിച്ച് പ്രതിപക്ഷ നേതാവ് രമേശ് ചെന്നിത്തല. ആരോഗ്യമന്ത്രിക്ക് മീഡിയാ മാനിയയാണെന്നും ഇമേജ് ഉണ്ടാക്കുക എന്നതു മാത്രമാണ് ലക്ഷ്യമെന്നും ചെന്നിത്തല പറഞ്ഞു. എല്ലാ ദിവസവും നാലു വാര്ത്താസമ്മേളനം വീതമാണ് മന്ത്രി നടത്തുന്നത്. ആരോഗ്യമന്ത്രിയുടെ മീഡിയാ മാനിയയും ഇമേജ് ബില്ഡിംഗും അവസാനിപ്പിക്കണം. പ്രതിച്ഛായ വളര്ത്താനാണ് മന്ത്രിയുടെ ശ്രമമെന്നും ചെന്നിത്തല പറഞ്ഞു.
വാര്ത്താസമ്മേളനം എപ്പോഴും നടത്തേണ്ടതില്ല. വാര്ത്താക്കുറിപ്പ് ഇറക്കിയാലും മതി. നിയമസഭയിലെ കാര്യങ്ങള് തനിക്ക് അനുകൂലമായി മന്ത്രി പ്രചരിപ്പിക്കുകയായിരുന്നുവെന്നു ചെന്നിത്തല ആരോപിച്ചു. കൊറോണയുടെ പശ്ചാത്തലത്തില് സഭ നിര്ത്തിവെക്കുന്നതിനോട് പ്രതിപക്ഷത്തിന് യോജിപ്പില്ല. ഇത് ജനങ്ങള്ക്കിടയില് അനാവശ്യ ഭീതി വളര്ത്തും. ലോക്സഭയോ മറ്റ് സംസ്ഥാന നിയമസഭ സമ്മേളനങ്ങളോ കൊറോണ ഭീതിയുടെ പേരില് നിര്ത്തിവെക്കുന്നില്ലല്ലോ എന്നും പ്രതിപക്ഷ നേതാവ് ചോദിച്ചു.
കൊറോണ പ്രതിരോധ നടപടികളോട് പ്രതിപക്ഷം നല്ല രീതിയില് സര്ക്കാരിനോട് സഹകരിക്കുന്നുണ്ട്. സര്ക്കാര് നടപടികളില് ഏതെങ്കിലും തരത്തില് വീഴ്ച ഉണ്ടായാല് ചൂണ്ടിക്കാട്ടാനുള്ള ഏക വേദിയാണ് നിയമസഭ. ഇതാണ് പ്രതിപക്ഷം കഴിഞ്ഞദിവസം സഭയില് ഉന്നയിച്ചത്. എന്നാല് ആരോഗ്യമന്ത്രി സോഷ്യല് മീഡിയയിലൂടെ വളരെ മോശമായ പ്രചാരണമാണ് നടത്തിയത്. ആരോഗ്യമന്ത്രിയുടെ ഈ മീഡിയാ മാനിയ കൂടുതലാണ് അത് ഒഴിവാക്കണം രമേശ് ചെന്നിത്തല പറഞ്ഞു.
ജനങ്ങളുടെ ആശങ്കകളാണ് പ്രതിപക്ഷം സഭയില് ഉന്നയിച്ചത്. സഭയില് നടന്ന കാര്യങ്ങള് വെട്ടി, അവര്ക്ക് ഇഷ്ടമുള്ള കാര്യങ്ങള് മാത്രം സോഷ്യല് മീഡിയയിലൂടെ പ്രചരിപ്പിച്ച് പ്രതിപക്ഷത്തെ അപമാനിക്കാനാണ് ശ്രമിച്ചത്. ഇമേജ് ബില്ഡിംഗ് അല്ല ആവശ്യം. ഈ ഏര്പ്പാട് മന്ത്രി നിര്ത്തണം. ആളുകള് പരിഭ്രാന്തിയിലാണ്. സംസ്ഥാനത്ത് ആവശ്യത്തിന് മാസ്കുകളില്ല, വേണ്ടത്ര സൗകര്യങ്ങളില്ല, ഡോക്ടര്മാരുടെ കുറവുണ്ട്. ഇതെല്ലാം പരിഹരിക്കാനുള്ള നടപടികളാണ് വേണ്ടത്. എയര്പോര്ട്ടുകളില് ഇപ്പോഴും വേണ്ടത്ര പരിശോധന നടക്കുന്നില്ലെന്നും പ്രതിപക്ഷ നേതാവ് ആരോപിച്ചു.