ഒറ്റ പ്രസവത്തില്‍ ആറ് കുട്ടികള്‍; അപൂര്‍വങ്ങളില്‍ അപൂര്‍വ വേളയിൽ രണ്ട് കുട്ടികള്‍ വിടവാങ്ങി
ഭോപ്പാല്‍: അപൂർവങ്ങളിൽ അപൂർവം. ഡോക്ടർമാർ അങ്ങനെയാണ് ആ പ്രസവത്തെ വിശേഷിപ്പി്ച്ചത്. മധ്യപ്രദേശിലെ ഷിയോപൂരിലെ യുവതിക്കാണ് ഒറ്റപ്രസവത്തില്‍ ആറ് കുട്ടികള്‍ ജനിച്ചത്. നാല് ആണ്‍കുട്ടികളും രണ്ട് പെണ്‍കുട്ടികളുമാണ് ജനിച്ചത്. ഇതില്‍ രണ്ട് പെണ്‍കുട്ടികള്‍ പ്രസവശേഷം ഉടന്‍ മരിച്ചു. ആണ്‍കുട്ടികളെ എന്‍എന്‍സിയുവിലേക്ക് മാറ്റിയിട്ടുണ്ട്.
ബറോദ ഗ്രാമത്തിലെ 22 കാരിയായ മൂര്‍ത്തി മാലി എന്ന യുവതിയാണ് ആറ് കുഞ്ഞുങ്ങള്‍ക്ക് ജന്മം നല്‍കിയത്. പ്രസവവേദന അനുഭവപ്പെട്ടപ്പോള്‍ ആദ്യം പ്രാഥമിക ആശുപത്രിയിലേക്കാണ് യുവതിയെ ഭര്‍ത്താവ് വിനോദ് എത്തിച്ചത്. പിന്നീട് ഇവരെ ജില്ല ആശുപത്രിയിലേക്ക് മാറ്റുകയായിരുന്നു. സാധാരണ പ്രസവമായിരുന്നെന്നും 500 മുതല്‍ 790 ഗ്രാം വരെയാണ് കുട്ടികളുടെ തൂക്കമെന്നും സിവില്‍ സര്‍ജന്‍ ഡോ. ആര്‍ ബി ഗോയല്‍ പറഞ്ഞു. മൊത്തം കുട്ടികളുടെ തൂക്കം 3.65 കിലോ ഗ്രാമാണ്. ഒറ്റ പ്രസവത്തില്‍ ആറ് കുട്ടികള്‍ ജനിക്കുന്നത് അപൂര്‍വമാണെന്നും അദ്ദേഹം പറഞ്ഞു.
100 കോടിയില്‍ ഒരാള്‍ക്ക് മാത്രമാണ് ഒറ്റ പ്രസവത്തില്‍ ആറ് കുട്ടികള്‍ ജനിക്കുകയെന്ന് ഗാന്ധി മെഡിക്കല്‍ കോളേജ് ഗൈനക്കോളജി തലവന്‍ ഡോ. അരുണ്‍കുമാര്‍ പറഞ്ഞു. കഴിഞ്ഞ 30 വര്‍ഷത്തില്‍ ഒരിക്കല്‍ മാത്രമാണ് ഇത്തരമൊരു സംഭവമുണ്ടായതെന്നും അദ്ദേഹം വ്യക്താക്കി. മരിച്ച രണ്ട് കുട്ടികളുടെയും ഭാരം തീരെ കുറവായിരുന്നെന്നും അദ്ദേഹം പറഞ്ഞു. രണ്ട് പെണ്‍കുട്ടികള്‍ മരിച്ച വിവരം ആശുപത്രി അധികൃതർ അമ്മയെ ഇനിയും അറിയിച്ചിട്ടില്ല.
