ഖത്തർ പ്രധാനമന്ത്രിയായി ഷെയ്ഖ് ഖാലിദ് ബിന് അബ്ദുള്ളസീസ് അല് താനി അധികാരമേറ്റു
ഖത്തറിൽ രാജ്യത്തിന്റെ പുതിയ പ്രധാനമന്ത്രിയായി ഷെയ്ഖ് ഖാലിദ് ബിന് ഖലീഫ ബിന് അബ്ദുള്ളസീസ് അല് താനി അധികാരമേറ്റു. ഖത്തറിന്റെ പ്രധാനമന്ത്രി, ആഭ്യന്തരമന്ത്രി എന്നീ പദവികളിൽ ഷെയ്ഖ് ഖാലിദിനെ പ്രഖ്യാപിച്ചുകൊണ്ട് അമീര് ഷെയ്ഖ് തമീം ബിന് ഹമദ് അല് താനിയാണ് ഉത്തരവ് പുറപ്പെടുവിച്ചത്.
രാജ്യത്തിന്റെ മുൻപ്രധാനമന്ത്രിയും ആഭ്യന്തര മന്ത്രിയുമായിരുന്ന ഷെയ്ഖ് അബ്ദുള്ള ബിന് നാസര് ബിന് ഖലീഫ അല് താനിയുടെ രാജി സ്വീകരിച്ച ശേഷമാണ് പുതിയ നിയമനം. എന്നാൽ അദ്ദേഹം രാജിവച്ചതിന്റെ കാരണം വ്യക്തമല്ല. ഇന്ന് അമീരി ദിവാനില് നടന്ന ചടങ്ങില് അമീറിന്റെ മുമ്പാകെയാണ് രാജ്യത്തിന്റെ പുതിയ പ്രധാനമന്ത്രിയായി ഷെയ്ഖ് ഖാലിദ് സത്യപ്രതിജ്ഞ ചെയ്ത് അധികാരത്തിലേറിയത്.
ഡെപ്യൂട്ടി അമീറായ് ഷെയ്ഖ് അബ്ദുള്ള ബിന് ഹമദ് അല് താനിയും സത്യപ്രതിജ്ഞാ ചടങ്ങില് പങ്കെടുത്തു. ഷെയ്ഖ് ഖാലിദിന്റെ കീഴിലുള്ള പുതിയ മന്ത്രിസഭയും സത്യപ്രതിജ്ഞ ചെയ്ത് അധികാരത്തിലേറിയിട്ടുണ്ട്. ആഭ്യന്തരമന്ത്രി ഒഴികെയുള്ള മന്ത്രിമാരെല്ലാം പഴയ മന്ത്രിസഭയിലെ അംഗങ്ങള് തന്നെയാണ്.