അതീവ രഹസ്യം; സ്വിസ് ബാങ്ക് നിക്ഷേപമുള്ള ഇന്ത്യക്കാരുടെ വിവരം പുറത്തുവിടാനാകില്ലെന്ന് കേന്ദ്ര സര്ക്കാര്
ഇന്ത്യയിൽ നിന്നും സ്വിസ് ബാങ്കില് പണം നിക്ഷേപിച്ചവരുടെ വിവരങ്ങള് പുറത്തുവിടാനാകില്ലെന്ന് കേന്ദ്ര ധനമന്ത്രാലയം. വിവരാവകാശ നിയമ പ്രകാരം നൽകിയ ചോദ്യത്തിനാണ് ധനമന്ത്രാലയം നിലപാട് വ്യക്തമാക്കിയത്. ഇരു രാജ്യങ്ങളും തമ്മിലുള്ള കരാര് പ്രകാരം വിവരങ്ങള് അതീവ രഹസ്യമാണെന്നും പുറത്തുവിടാനാകില്ലെന്നും ധനമന്ത്രാലയം വ്യക്തമാക്കി.
എന്നാൽ മറ്റ് രാജ്യങ്ങളില് നിന്ന് ലഭിച്ച കള്ളപ്പണത്തിന്റെ കണക്കും ധനമന്ത്രാലയം പുറത്തുവിടാന് തയ്യാറായില്ല. ഇവ മറ്റുള്ളവർക്ക് നല്കിയാല് സ്വിറ്റ്സര്ലന്ഡുമായുള്ള കരാറിന്റെ ലംഘനമാകുമെന്നും നികുതി സംബന്ധമായ വിവരങ്ങള് വിദേശ രാജ്യത്തില് നിന്ന് ലഭിക്കുന്നത് വിവരാവകാശ നിയമത്തിന്റെ പരിധിക്ക് പുറത്താണെന്നും മന്ത്രാലയം വ്യക്തമാക്കി.
ഏതെങ്കിലും വിദേശ രാജ്യവുമായി ബന്ധപ്പെട്ട വിവരങ്ങള് പുറത്തുവിടുന്നത് രാജ്യത്തിന്റെ പരമാധികാരത്തിനും അഖണ്ഡതക്കും സുരക്ഷക്കും സാമ്പത്തിക താല്പര്യത്തിനും എതിരാണെന്നും കേന്ദ്രസര്ക്കാര് പറയുന്നു. മുൻ വർഷങ്ങളിൽ സ്വിറ്റ്സര്ലന്ഡില് അക്കൗണ്ടുള്ള ഇന്ത്യന് പൗരന്മാരുടെ വിവരങ്ങള് സര്ക്കാര് തേടിയിരുന്നു.
ഇരു രാജ്യങ്ങളും തമ്മിലുള്ള പുതിയ കരാര് പ്രകാരം കഴിഞ്ഞ സെപ്റ്റംബറിലാണ് ചിലരുടെ വിവരങ്ങള് സ്വിറ്റ്സര്ലന്ഡ് ഇന്ത്യക്ക് കൈമാറിയത്. ഇത്തരത്തിൽ വിവരങ്ങള് അതീവ രഹസ്യമായി സൂക്ഷിക്കാമെന്ന കരാറിന്മേലാണ് വിവരങ്ങള് നല്കിയതെന്നാണ് സര്ക്കാര് വിശദീകരണം.