യുപിയിൽ പത്തൊൻപത് വയസുകാരിയായ ഊമയും ബധിരയുമായ പെൺകുട്ടിയെ ബലാത്സംഗം ചെയ്തു
യുപിയിലെ കാൺപൂരിൽ പത്തൊൻപത് വയസുമാത്രം പ്രായമുള്ള ഊമയും ബധിരയുമായ പെൺകുട്ടിയെ ബലാത്സംഗത്തിനിരയാക്കി. കഴിഞ്ഞ ചൊവ്വാഴ്ച രാത്രിയാണ് സംഭവം. തന്നെ ആക്രമിച്ചത് സ‍ഞ്ജയ് ഗൗതം എന്നയാളാണ് എന്ന് തിരിച്ചറിഞ്ഞതായി പോലീസ് പറഞ്ഞു.
പെൺകുട്ടിയുടെ വീട്ടുകാർ ഭക്ഷണം കഴിക്കുന്ന സമയത്ത് വീട്ടിൽ നിന്നും പെൺകുട്ടിയെ വിളിച്ചിറക്കി ആളൊഴിഞ്ഞ സ്ഥലത്ത് കൊണ്ടെത്തിച്ച് ഇയാൾ ബലാത്സംഗം ചെയ്യുകയായിരുന്നു. പീഡനശേഷം ഇയാൾ പെൺകുട്ടിയെ ഭീഷണിപ്പെടുത്തിയതായും പോലീസ് ഉദ്യോഗസ്ഥനായ വിനോദ് കുമാർ സിംഗ് മാധ്യമങ്ങളോട് പറഞ്ഞു.
വീട്ടിൽ ഭക്ഷണം കഴിച്ചതിന് ശേഷമാണ് പെൺകുട്ടിയെ കാണാതായി എന്ന വിവരം മാതാപിതാക്കൾ അറിയുന്നത്. ഇതിനെ തുടർന്ന് മണിക്കൂറുകൾ നീണ്ട സമയം നടത്തിയ അന്വേഷണത്തിനൊടുവിൽ ബലാത്സംഗം ചെയ്യപ്പെട്ട നിലയിൽ കുട്ടിയെ കണ്ടെത്തുകയായിരുന്നു. പെൺകുട്ടിയുടെ രക്ഷിതാക്കൾ നൽകിയ പരാതിയുടെ അടിസ്ഥാനത്തിൽ പ്രതിക്കെതിരെ കേസെടുത്ത് അന്വേഷണം ഊർജ്ജിതമാക്കിയതായി പോലീസ് അറിയിച്ചു.
