സിഇടി എഞ്ചിനീയറിംഗ് കോളേജില് കാണാതായ വിദ്യാര്ത്ഥിയെ മരിച്ച നിലയില് കണ്ടെത്തി :പിന്നില് കഞ്ചാവ് മാഫിയയെന്ന് സുഹൃത്തുക്കള്
തിരുവനന്തപുരം: സിഇടി എഞ്ചിനീയറിംഗ് കോളേജില് കഴിഞ്ഞ ദിവസം കാണാതായ വിദ്യാര്ത്ഥിയെ മരിച്ച നിലയില് കണ്ടെത്തി. നെയ്യാറ്റിന്കര സ്വദേശി രതീഷ് കുമാറാണ് കോളേജിലെ സിവില് എഞ്ചിനീയറിംഗ് ഡിപ്പാര്ട്ട്മെന്റിന്റെ ശുചിമുറിയില് മരിച്ചനിലയില് കണ്ടെത്തിയത്.
രതീഷിന് കഞ്ചാവ് മാഫിയയുടെ ഭീഷണി ഉണ്ടായിരുന്നതായി സുഹൃത്തുക്കള് ആരോപിച്ചു. കഞ്ചാവ് മാഫിയയുമായി ബന്ധമുള്ളവര് പലവട്ടം രതീഷിനെ മര്ദ്ദിച്ചിരുന്നുവെന്നും പരാതി നല്കിയിട്ടും പൊലീസ് നടപടിയെടുത്തില്ലെന്നും ഇവര് കുറ്റപ്പെടുത്തി.രതീഷിനെ കാണാതായ വിവരം അറിയിച്ചിട്ടും പൊലീസ് എത്താന് വൈകിയെന്നാണ് ഇവര് ആരോപിച്ചത്. കഴിഞ്ഞ രണ്ട് ദിവസവും പൊലീസ് കാര്യമായ തെരച്ചില് നടത്തിയില്ലെന്നും ഇവര് ആരോപിച്ചു.
മകന്റെ മരണത്തില് സംശയമുണ്ടെന്നും ആര്ഡിഒയുടെ നേതൃത്വത്തില് ഇന്ക്വസ്റ്റ് നടത്തണമെന്നും അമ്മ ഗിരിജ പൊലീസിനോട് ആവശ്യപ്പെട്ടു. ആര്ഡിഒ ഇന്ക്വസ്റ്റ് നടത്തിയ ശേഷം മൃതദേഹം പോസ്റ്റ്മോര്ട്ടത്തിനായി മാറ്റും.
നേരത്തെ രതീഷ് കഞ്ചാവ് വില്പനക്കരെ കുറിച്ചു എക്സൈസിന് വിവരം നല്കിയിരുന്നു. ഇതാണ് പകയ്ക്ക് കാരണമെന്നും സുഹൃത്തുക്കള് പറയുന്നു.