നിയമപ്രകാരമല്ലാതെ പൊലീസ് ഫോൺ ചോർത്താറില്ല: ചെന്നിത്തലയോട് ഡിജിപി
തിരുവനന്തപുരം: നിയമപ്രകാരമല്ലാതെ പൊലീസ് ആരുടെയും ഫോണ് ചോർത്താറില്ലെന്ന് ഡിജിപി ലോക്നാഥ് ബെഹ്റ.
പ്രതിപക്ഷ നേതാക്കളുടെ ഫോണ് പൊലീസ് ചോർത്തുവെന്ന പ്രതിപക്ഷനേതാവിന്റെ ആരോപണത്തോട് പ്രതികരിക്കുകയായിരുന്നു ഡിജിപി.
അന്വേഷണ കാര്യത്തിനും രാജ്യസുരക്ഷയെ ബാധിക്കുന്ന കാര്യങ്ങള്‍ക്കും മാത്രമാണ് നിയമാനുസരണം ഫോണ് ചോർത്താനാകുന്നത്. അല്ലാതെ ആരുടെയും ഫോണ് ചോർത്താറില്ലെന്നും ലോക്നാഥ് ബെഹ്റ പറഞ്ഞു.
തന്‍റേതടക്കമുള്ള പ്രതിപക്ഷ നേതാക്കളുടെ ഫോൺ ചോർത്തുന്നുവെന്നായിരുന്നു രമേശ് ചെന്നിത്തലയുടെ ആരോപണം. കഴിഞ്ഞ മൂന്ന് നാലുദിവസമായി തന്‍റെയും നേതാക്കളുടെയും ഫോണ് ചോർത്തുന്നുണ്ട്.
ഇത് സർക്കാർ നിർദ്ദേശപ്രകാരമാണോയെന്ന് വ്യക്തമാക്കണമെന്നും ചെന്നിത്തല ആവശ്യപ്പെട്ടു. കൂടത്തായി കൊലപാതക പരമ്പര കേരള പൊലീസിന് മുന്നിലെ വെല്ലുവിളിയാണെന്നും പൊലീസ് മേധാവി വ്യക്തമാക്കി.
