ദേശീയ പൗരത്വ പട്ടികയില്‍ ഉള്‍പ്പെടാത്തവരില്‍ ചന്ദ്രയാന്‍ രണ്ട് ദൗത്യത്തിന്‍റെ ഉപദേശകനും കുടുംബവും
ഇന്ത്യൻ ബഹിരാകാശ രംഗത്തെ അസമില്‍ നിന്നുള്ള പ്രമുഖ ശാസ്ത്രജ്ഞനും ചന്ദ്രയാന്‍ രണ്ട് ദൗത്യത്തിന്‍റെ ഉപദേശകനുമായ ഡോ. ജിതേന്ദ്രനാഥ് ഗോസ്വാമി അന്തിമ ദേശീയ പൗരത്വ പട്ടികയില്‍ നിന്നും പുറത്ത്. കഴിഞ്ഞ മാസം 31 ന് പുറത്തിറക്കിയ അന്തിമ പട്ടികയില്‍ അദ്ദേഹവും കുടുംബവും ഉള്‍പ്പെട്ടിട്ടില്ല. താൻ ഇപ്പോൾ അഹമ്മദാബാദിലാണ് താമസിക്കുന്നതെന്നും കുടുംബം അസമിലാണ് ഉള്ളതെന്നും ജിതേന്ദ്രനാഥ് ഗോസ്വാമി പ്രതികരിച്ചു.
“ഒരുപക്ഷെ പൗരത്വ പട്ടികയില്‍ നിന്നും പുറത്തായിട്ടുണ്ടാകാം.എന്നാൽ ഞങ്ങളുടെ കുടുംബം അസമിലാണ് ഉള്ളത്. അവിടെ ജോര്‍ഹട്ടില്‍ ഞങ്ങള്‍ക്ക് ഭൂമിയുമുണ്ട്. നിലവിൽ താമസിക്കുന്ന അഹമ്മദാബാദിലാണ് ഞങ്ങള്‍ക്ക് വോട്ടവകാശമുള്ളത്.”- അദ്ദേഹം പറഞ്ഞു.
ഇനി ഭാവിയില്‍ ഇതുമായി ബന്ധപ്പെട്ട് ഏതെങ്കിലും രീതിയിലുള്ള പ്രശ്നങ്ങള്‍ ഉണ്ടായാല്‍ ലാന്‍റ് ഡോക്യുമെന്‍റ്സ് കാണിച്ച് അത് പരിഹരിക്കാമെന്നാണ് കരുതുന്നതെന്നും അദ്ദേഹം പറയുന്നു. അസമിലെ നിയമസഭാ സ്പീക്കര്‍ ഹിതേന്ദ്രനാഥ് ഗോസ്വാമി ഇദ്ദേഹത്തിന്‍റെ സഹോദരാണ്. ദേശീയ പൗരത്വ പട്ടികയില്‍ നിന്നും പുറത്തായതിനെക്കുറിച്ച് സഹോദരനോട് സംസാരിച്ച് ഇനിയെന്താണ് ചെയ്യേണ്ടതെന്ന് അന്വേഷിക്കുമെന്നും അസമിലേക്ക് തിരിച്ചുപോകാന്‍ ഉദ്ദേശിക്കുന്നില്ലെന്നും അദ്ദേഹം കൂട്ടിച്ചേര്‍ത്തു.
