കേരളത്തില് ശക്തമായ മഴയ്ക്ക് സാധ്യത; എട്ട് ജില്ലകളില് യെല്ലോ അലര്ട്ട്
തിരുവനന്തപുരം: കേരളത്തിലെ ചില ജില്ലകളില് ഇന്നും ശക്തമായ മഴയ്ക്ക് സാധ്യത ഉണ്ടെന്ന് കാലാസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. എട്ട് ജില്ലകളിലാണ് ഇന്ന് യെല്ലോ അലേര്ട്ട് പ്രഖ്യാപിച്ചിരിക്കുന്നത്.
എറണാകുളം, ഇടുക്കി, തൃശ്ശൂര്, പാലക്കാട്, മലപ്പുറം, കോഴിക്കോട്, കണ്ണൂര്, കാസര്കോട് എന്നീ ജില്ലകളിലാണ് യെല്ലോ അലേര്ട്ട്. ബംഗാള് ഉള്ക്കടലില് ഒഡിഷാ തീരത്ത് രൂപംകൊണ്ട ന്യൂനമര്ദ്ദം ശക്തിപ്രാപിക്കുന്നതിനാല് കേരളത്തില് ചില ജില്ലകളില് ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥാ വകുപ്പ് നല്കിയ മുന്നറിയിപ്പില് ഉള്ളത്.
തീരപ്രദേശത്തുള്ളവര് ജാഗ്രത പാലിക്കണമെന്നും കാലാവസ്ഥാ കേന്ദ്രം അറിയിച്ചിട്ടുണ്ട്. 24 മണിക്കൂറിനുള്ളില് ഏഴുമുതല് 11 വരെ സെന്റീ മീറ്റര് മഴ പെയ്യാന് സാധ്യത ഉണ്ടെന്നും മുന്നറിയിപ്പിലുണ്ട്. തെക്കന് ജില്ലകളില് ശക്തികുറഞ്ഞ ഒറ്റപ്പെട്ട മഴയ്ക്ക് സാധ്യത. തമിഴ്നാട്, പുതുച്ചേരി, കര്ണാടക തീരത്ത് ശക്തമായ കാറ്റ് അടിക്കാന് സാധ്യത ഉള്ളതിനാല് മത്സ്യബന്ധനത്തിന് വിലക്കേര്പ്പെടുത്തി.