പുതുതായി എത്തുന്ന കോൺഗ്രസ് അധ്യക്ഷന്‍ നിറവേറ്റേണ്ടത് രണ്ട് ലക്ഷ്യങ്ങള്‍; നിര്‍ദ്ദേശങ്ങളുമായി ശശിതരൂര്‍
ദേശീയ അധ്യക്ഷ സ്ഥാനത്ത് നിന്നും രാഹുല്‍ഗാന്ധിയുടെ രാജിക്ക് പിന്നാലെയുണ്ടായ നേതൃസ്ഥാനത്തെ വ്യക്തതയില്ലായ്മ പാര്‍ട്ടിയെ ബാധിക്കുന്നതായി മുതിര്‍ന്ന കോണ്‍ഗ്രസ് നേതാവ് ശശിതരൂര്‍. പാര്‍ട്ടിയുടെ വര്‍ക്കിംഗ് കമ്മിറ്റി അംഗങ്ങളെ ഉള്‍പ്പെടെ എല്ലാ പദവികളിലേക്കും പുതിയ തെരഞ്ഞെടുപ്പ് നടത്തണമെന്നും ശശിതരൂര്‍ എം പി വ്യക്തമാക്കി.
പാര്‍ട്ടിയെ നയിക്കാന്‍ യുവാക്കളെയാണ് ആവശ്യമെന്ന പഞ്ചാബ് മുഖ്യമന്ത്രി അമരീന്ദര്‍സിംഗിന്റെ അഭിപ്രായത്തെയും ശശീതരൂര്‍ പിന്തുണച്ചു. അടുത്തതായി പ്രിയങ്ക ഗാന്ധി കോണ്‍ഗ്രസ് അധ്യക്ഷ സ്ഥാനത്തേക്കുള്ള തെരഞ്ഞെടുപ്പില്‍ മത്സരിക്കുമെന്ന് കരുതുന്നു, പക്ഷെ തീരുമാനം ഗാന്ധി കുടുംബത്തിന്റേതായിരിക്കുമെന്നും തരൂര്‍ പറഞ്ഞു.
ഇപ്പോഴത്തെ സാഹചര്യത്തില്‍ നിര്‍ണായക തീരുമാനങ്ങള്‍ എടുക്കാന്‍ ആളില്ലാത്തത് പാര്‍ട്ടിയെ ബാധിക്കുന്നുണ്ടെന്നും തരൂര്‍ പറഞ്ഞു. ഈ സാഹചര്യം കോണ്‍ഗ്രസ് വര്‍ക്കിങ് കമ്മിറ്റി ഗൗരവ്വമായി തന്നെ കാണുന്നുണ്ടെന്നാണ് പ്രതീക്ഷിക്കുന്നതെന്നും ഉടനെ തന്നെ പരിഹാരം കണ്ടെത്തുമെന്നാണ് കരുതുന്നതെന്നും തരൂര്‍ വ്യക്തമാക്കി.
പാര്‍ട്ടിക്കുള്ളില്‍ ബ്രിട്ടീഷ് കണ്‍സര്‍വേറ്റീവ് പാര്‍ട്ടിയുടെ രീതിയില്‍ പ്രസിഡന്റ് തെരഞ്ഞെടുപ്പ് നടത്തണമെന്നും അങ്ങിനെ ചെയ്‌താല്‍ പാര്‍ട്ടി്ക്ക് ജനങ്ങള്‍ക്കിടയില്‍ സ്വാധീനം സൃഷ്ടിക്കാനാകുമെന്നും അദ്ദേഹം പറഞ്ഞു. പുതിയതായി നേതൃത്വത്തിലെത്തുന്നയാള്‍ക്ക് ഒരേസമയം പാര്‍ട്ടി പ്രവര്‍ത്തകരേയും വോട്ടര്‍മാരേയും ഒരുമിച്ച് കൊണ്ടു പോകേണ്ടതുണ്ടെന്നും അദ്ദേഹം പറഞ്ഞു. പ്രിയങ്കയ്ക്ക് ഇന്ദിരയുടേതിന് സമാനമായ രീതിയില്‍ ആളുകളെ ആകര്‍ഷിക്കാന്‍ സാധിക്കുമെന്നും അതേപോലെ പാര്‍ട്ടിയെ നയിക്കാനും സാധിക്കുമെന്നും തരൂര്‍ പറഞ്ഞു. എന്നാല്‍ തെരഞ്ഞെടുപ്പാണ് നേതൃത്വത്തെ കണ്ടെത്താനുള്ള ശരിയായ വഴിയെന്നും അദ്ദേഹം വ്യക്തമാക്കി.
