രോഹിതിന് വീണ്ടും സെഞ്ചുറി; ബംഗ്ലാദേശിനെതിരെ ഇന്ത്യയ്ക്ക് മികച്ച സ്കോർ
ലോകകപ്പിൽ മികച്ച പ്രകടനം തുടരുന്ന രോഹിത് ശര്മയുടെ സെഞ്ചുറി മികവില് ബംഗ്ലാദേശിനു മുന്നില് മികച്ച സ്കോര് സ്വന്തമാക്കി ഇന്ത്യ. രോഹിത് ശര്മ നേടിയ സെഞ്ചുറിയുടെയും കെ എല് രാഹുലിന്റെ അര്ധ സെഞ്ചുറിയുടെയും ഋഷഭ് പന്തിന്റെ മികച്ച പ്രകടനത്തിന്റെയും മികവിൽ ഒമ്പത് വിക്കറ്റ് നഷ്ടത്തില് 314 റണ്സാണ് ഇന്ത്യ സ്വന്തമാക്കിയത്.
അതേസമയം ബംഗ്ലാദേശിന് വേണ്ടി മുസ്താഫിസുര് റഹ്മമാന് അഞ്ച് വിക്കറ്റുകള് സ്വന്തമാക്കി. ടോസ് ലഭിച്ചു ബാറ്റിംഗ് തെരഞ്ഞെടുത്ത ഇന്ത്യക്ക് വേണ്ടി അതിഗംഭീര തുടക്കമാണ് രോഹിത് ശര്മ- കെ എല് രാഹുല് സഖ്യം നല്കിയത്. ബംഗ്ല നായകന് മൊര്ത്താസയെ ആദ്യ ഓവറില് തന്നെ സിക്സറിന് പറത്തിയാണ് ഹിറ്റ്മാന് രോഹിത് തുടങ്ങിയത്. മുസ്താഫിസുറിന്റെ പന്തില് രോഹിത് നല്കിയ അവസരം തമീം ഇക്ബാല് നിലത്തിട്ടതോടെ ഇന്ത്യക്ക് ആശ്വാസമായി. കെ എല് രാഹുലിന് അധികം സമ്മര്ദ്ദം കൊടുക്കാതെ ആക്രമണം സ്വയം ഏറ്റെടുത്ത് ഹിറ്റ്മാന് കളിച്ചതോടെ ഇന്ത്യന് സ്കോര് ബോര്ഡിലേക്ക് റണ്സ് എത്തി.
സമ്മര്ദം ഒഴിഞ്ഞതോടെ രാഹുലും ബൗണ്ടറികള് കണ്ടെത്തി തുടങ്ങി. 14-ാം ഓവറില് രോഹിത് അര്ധ സെഞ്ചുറി പൂര്ത്തിയാക്കി. അധികം വെെകാതെ ടീം സ്കോറും 100ഉം കടന്നു. 90 പന്തില് രോഹിത് സെഞ്ചുറി നേട്ടം സ്വന്തമാക്കി. ഇതിന് പിന്നാലെ വമ്പനടികള് തുടരുന്നതിനിടെയാണ് സൗമ്യ സര്ക്കാരിന്റെ പന്തില് രോഹിത് വീഴുന്നത്. 92 പന്തില് 104 രണ്സ് രോഹിത് കൂട്ടിച്ചേര്ത്തു. അതിനുള്ളില് 180 റണ്സിന്റെ റെക്കോര്ഡ് കൂട്ടുകെട്ട് രാഹുലുമായി ചേര്ന്ന് ഹിറ്റ്മാന് പടുത്തുയര്ത്തിയിരുന്നു. രോഹിത് മടങ്ങി അധികം വെെകാതെ രാഹുലിനെ റൂബല് വിക്കറ്റ് കീപ്പര് മുഷ്ഫിഖുര് റഹീമിന്റെ കെെകളില് എത്തിച്ചു. 92 പന്തില് 77 റണ്സാണ് രാഹുല് നേടിയത്.