ബി.ജെ.പിയുടെ പണക്കൊഴുപ്പ് സുതാര്യമായ തെരഞ്ഞെടുപ്പിനെ ബാധിച്ചു; ധവളപത്രം ഇറക്കണമെന്ന് കോൺഗ്രസ്
ബി.ജെ.പിയുടെ പണക്കൊഴുപ്പ് സുതാര്യമായ തെരഞ്ഞെടുപ്പിനെ ബാധിച്ചെന്ന് കോണ്ഗ്രസ് വക്താവ് അഭിഷേക് മനു സിംഗ്വി. തെരഞ്ഞെടുപ്പ് പ്രചാരണത്തിനായി ബിജെപി അറുപതിനായിരം കോടി ചെലവഴിച്ചെന്ന് കോണ്ഗ്രസ് വക്താവ് ചൂണ്ടിക്കാട്ടി. തെരഞ്ഞെടുപ്പ് പ്രവർത്തനങ്ങളെ വക്രീകരിച്ചതിലൂടെ ജനാധിപത്യത്തിനു ഹാനികരമായെന്നും അദ്ദേഹം ആരോപിച്ചു. തെരഞ്ഞെടുപ്പിൽ ബിജെപി ചെലവഴിച്ച തുക സംബന്ധിച്ച് ധവളപത്രം ഇറക്കണമെന്നും കോൺഗ്രസ് ആവശ്യപ്പെട്ടു.
തെരഞ്ഞെടുപ്പിൽ ബിജെപി 27,000 കോടി രൂപയാണ് ചെലവഴിച്ചതെന്ന് കഴിഞ്ഞ ദിവസം ഒരു സന്നദ്ധ സംഘടന കണക്കുകൾ സഹിതം റിപ്പോർട്ട് ചെയ്തിരുന്നു. രാജ്യത്താകെ ലോക്സഭാ തെരഞ്ഞെടുപ്പിൽ എല്ലാപാർട്ടികളും ആകെ 60,000 കോടി രൂപയാണ് ചെലവഴിച്ചത്. ഇതിൽ 45 ശതമാനവും ബിജെപിയുടെ ചെലവിൽ എഴുതപ്പെട്ടതായിരുന്നു. ബിജെപിക്ക് ആരാണ് ഫണ്ടിംഗ് നടത്തിയതെന്നു വെളിപ്പെടുത്തണമെന്നും കോൺഗ്രസ് ആവശ്യപ്പെട്ടു.