‘ഫയലുകള് എടുത്തെറിഞ്ഞു, ഇയാള്ക്കെന്താ കൊമ്പുണ്ടോ എന്ന് ചോദിക്കേണ്ടി വന്നു’; തോമസ് ഐസക്കിനും വി എസ് അച്യുതാനന്ദനുമെതിരെ സി ദിവാകരന്
തിരുവനന്തപുരം: വി.എസ് സര്ക്കാരിന്റെ കാലത്ത് സി.പി.ഐ മന്ത്രിമാര്ക്ക് അവഗണ നേരിട്ടിരുന്നെന്ന് സി.പി.ഐ നേതാവും തിരുവനന്തപുരം എല്.ഡി.എഫ് സ്ഥാനാര്ത്ഥിയുമായ സി.ദിവാകരന്. വി.എസ് സര്ക്കാരിന്റെ സമയത്ത് മന്ത്രി തോമസ് ഐസക് സി.പി.ഐ മന്ത്രിമാരുടെ ഫയലുകള് പിടിച്ചുവെച്ചുവെന്നും അദ്ദേഹം ആരോപിച്ചു. തിരുവനന്തപുരത്ത് മുന് പേഴ്സണല് സ്റ്റാഫംഗം ഡി സാജു അനുസ്മരണ ചടങ്ങിലാണ് സിപിഎം നേതാക്കള്ക്കെതിരെ ദിവാകരന് ആഞ്ഞടിച്ചത്.
വി എസ് അച്യുതാനന്ദന് സര്ക്കാരിന്റെ കാലത്ത് ധനമന്ത്രിയായിരുന്ന ഡോ. തോമസ് ഐസക്ക് സിപിഐ മന്ത്രിമാരുടെ ഫയലുകള് തടഞ്ഞുവെച്ചു. ഐസക്കിനെന്താ കൊമ്പുണ്ടോ എന്ന് അന്ന് താന് ചോദിച്ചു. അക്കാലത്ത് സിപിഐ മന്ത്രിമാരെ തഴയുന്ന സമീപനമായിരുന്നു എന്നും ദിവാകരന് പറഞ്ഞു.
ഞാനാണ് മന്ത്രി. ഞാനാണ് വകുപ്പ് കൈകാര്യം ചെയ്യുന്നത്. ഞാന് സൈന് ചെയ്താല് അത് ക്യാബിനറ്റ് അംഗീകരിക്കേണ്ട കാര്യമേയുള്ളൂ. ക്യാബിനറ്റിന്റെ അകത്ത് മന്ത്രിമാര് തമ്മില് തര്ക്കങ്ങള് വരും. ശക്തമായി ക്യാബിനറ്റിന്റെ അകത്ത് ഫൈറ്റ് ചെയ്തിട്ടുണ്ട്. ഫയലുകള് വരെ എടുത്തെറിഞ്ഞിട്ടുണ്ട് ശമ്പള കമ്മീഷന്റെ കാര്യത്തില്.
ധനകാര്യമന്ത്രിയോട് ഇയാള്ക്കെന്താ കൊമ്പുണ്ടോ എന്നു താന് ചോദിച്ചു. ഞാനും മന്ത്രിയാണ്. ഓരോ വകുപ്പിലും കേറി മേയാന് ധനമന്ത്രിക്ക് എവിടെയാണ് അധികാരം കൊടുത്തിട്ടുള്ളത്. റൂള് ഓഫ് ബിസിനസ്സില് ഞാന് വായിച്ചിട്ട് ഒന്നു കാണുന്നില്ലെന്ന് ദിവാകരന് പറഞ്ഞു. വി എസ് അച്യുതാനന്ദന് അധ്യക്ഷനായ ഭരണപരിഷ്കാര കമ്മീഷന് സമ്പൂര്ണ്ണ പരാജയമാണെന്നും ദിവാകരന് ആരോപിച്ചു.