Kerala

അഷിത പലതും പുസ്തകത്തിൽ പറഞ്ഞിട്ടില്ല, അതൊന്നും തന്നെക്കൊണ്ട്‌ പറയിക്കരുത്; അഷിതയുടെ സഹോദരനോട് ബാലചന്ദ്രന്‍ ചുള്ളിക്കാട്‌

എഴുത്തുകാരി അഷിതയെക്കുറിച്ച്‌ അടിസ്ഥാനമില്ലാത്ത ആരോപണങ്ങള്‍ ഇതിനയും ഉണ്ടായാൽ സഹോദരനെതിരെ നിയമനടപടി സ്വീകരിക്കാന്‍ തയ്യാറാകുമെന്ന്‌ എഴുത്തുകാരന്‍ ബാലചന്ദ്രന്‍ ചുള്ളിക്കാട്‌. തനിക്ക് അഷിതയുമായി 1975 മുതല്‍ സൗഹൃദമുണ്ടായിരുന്നു. 38 വർഷം മുൻപ് അഷിത തന്നോട്‌ പങ്കുവച്ച കാര്യങ്ങളുടെ മൃദുവായ ആവര്‍ത്തനം മാത്രമാണ്‌ അഭിമുഖത്തിലൂടെ പുറത്തുവന്നിട്ടുള്ളത്‌.

അവര്‍ നേരിട്ട അനുഭവങ്ങൾ പറഞ്ഞതുകേട്ട്‌ പലപ്പോഴും താന്‍ ഉറക്കെക്കരഞ്ഞിട്ടുണ്ട്‌. അഷിതമനോരോഗിയായിരുന്നു എന്ന് സ്ഥാപിക്കാന്‍ എന്ത്‌ തെളിവാണ്‌ സഹോദരന്‍ സന്തോഷ്‌ നായരുടെ പക്കലുള്ളതെന്നും അദ്ദേഹം ചോദിച്ചു. അഷിത മരിക്കുന്നതിന് മുൻപ് ഈ സഹോദരൻ ആരോപണങ്ങളുന്നയിക്കുകയോ അഭിമുഖത്തെപ്പറ്റി അഷിതയോട്‌ ചോദിക്കുകയോ ചെയ്യാമായിരുന്നല്ലോ എന്ന്‌ ബാലചന്ദ്രന്‍ ചുള്ളിക്കാട്‌ പറഞ്ഞു. .

അഷിത ജീവിച്ചിരുന്നപ്പോൾ ഭയം കൊണ്ടാണ്‌ അയാള്‍ ഒന്നിനും തയ്യാറാകാഞ്ഞത്‌. എന്നിട്ട് ഇപ്പോൾ അടിസ്ഥാനരഹിതമായ ആരോപണങ്ങളുന്നയിച്ച്‌ അഷിതയെ അപകീര്‍ത്തിപ്പെടുത്താന്‍ ശ്രമിക്കുകയാണ്‌. കലാകാരന്മരെയും എഴുത്തുകാരെയും കുറിച്ച്‌ എന്ത്‌ പറഞ്ഞാലും ജനം വിശ്വസിക്കുന്നുമെന്നുള്ള സമൂഹപൊതുബോധമാണ്‌ സഹോദരന്റെ ഈ പ്രവര്‍ത്തിക്ക്‌ പിന്നിലുള്ളത്‌.

എറണാകുളംമഹാരാജാസ്‌ കോളേജില്‍ താനും അഷിതയും സഹപാഠികളായിരുന്നു. അക്കാലത്തു വീട്ടുകാരില്‍ നിന്ന്‌ നേരിടുന്ന ദുരനുഭവങ്ങളെക്കുറിച്ച്‌ അഷിത പറഞ്ഞിട്ടുണ്ട്‌. അവയിൽ പലതും വളരെ ഗുരുതരമായതാണ്‌. അതിനെക്കുറിച്ചൊന്നും പുസ്‌തകത്തില്‍ അഷിത പറഞ്ഞിട്ടില്ല. അതൊന്നും തന്നെക്കൊണ്ട്‌ പറയിക്കരുതെന്നാണ്‌ സഹോദരനോട്‌ ആവശ്യപ്പെടാനുള്ളത്‌. സഹോദരനെന്ന നിലയ്‌ക്ക്‌ ഒരുതരത്തിലും സ്‌നേഹമോ അനുകമ്പയോ പിന്തുണയോ അഷിതയ്‌ക്ക്‌ സന്തോഷില്‍ നിന്ന്‌ കിട്ടിയിട്ടില്ല.

ഒരു ഉറുമ്പിനെപ്പോലും നോവിക്കാതെ എഴുതിയും പ്രാര്‍ഥിച്ചും മാത്രം കഴിഞ്ഞ അഷിതയെക്കുറിച്ചാണ്‌ ഇങ്ങനെയൊക്കെ പറയുന്നതെന്നോര്‍ക്കണം. സഹോദരൻ ആരോപിക്കുന്നത്‌ പോലെ മാനസികപ്രശ്‌നങ്ങളുള്ള ഒരാളാണെങ്കില്‍ വര്‍ഷങ്ങള്‍ക്ക്‌ ശേഷവും ഇത്രയും കൃത്യമായി താന്‍ അനുഭവിച്ചതിനെയൊക്കെ ആവര്‍ത്തിച്ച്‌ അടയാളപ്പെടുത്താന്‍ സാധിക്കുമോ? സാരമില്ല എന്ന്‌ കരുതി അവഗണിക്കാനാവുന്ന ഒന്നല്ല സഹോദരന്റെ നീക്കം. വേണ്ടിവന്നാല്‍ അതിനെ നിയമപരമായി നേരിടുക തന്നെ ചെയ്യുമെന്നും ബാലചന്ദ്രന്‍ ചുള്ളിക്കാട്‌ പ്രതികരിച്ചു.