പത്താം ക്ലാസ് സര്ട്ടിഫിക്കറ്റില് ഞാന് മുസ്ലിം ആണ്; നിസ്കരിക്കാനുമറിയാം; നോമ്പ് എടുക്കാറുമുണ്ട്: അനു സിത്താര
ചുരുങ്ങിയ നാളുകള് കൊണ്ട് തന്നെ മലയാളിയുടെ ഇഷ്ടം പിടിച്ചുപറ്റിയ നായികയാണ് അനുസിതാര. ഇപ്പോഴിതാ താനും നോമ്പെടുക്കാറുണ്ടെന്ന് വെളിപ്പെടുത്തിയിരിക്കുകയാണ് നടി. വനിത മാഗസീനുമായുള്ള അഭിമുഖത്തിലാണ് അനു സിത്താര ഇക്കാര്യം പറഞ്ഞത്.
അച്ഛന്റെ ഉമ്മ നിസ്കരിക്കാനൊക്കെ പഠിപ്പിച്ചിട്ടുണ്ടെന്നും നോമ്പും എടുക്കാറുണ്ടെന്നും അഭിമുഖത്തില് അനു സിത്താര പറഞ്ഞു. ‘അച്ഛന് അബ്ദുള് സലാമിന്റെയും അമ്മ രേണുകയുടെയും വിപ്ലവ കല്യാണമാണ്. ഞാന് ജനിച്ച ശേഷമാണ് അമ്മവീട്ടുകാരുടെ പിണക്കം മാറിയത്. വിഷുവും ഓണവും റംസാനുമൊക്കെ ഞങ്ങള് ആഘോഷിക്കും. പത്താം ക്ലാസ് സര്ട്ടിഫിക്കറ്റില് ഞാന് മുസ്ലിം ആണ്’ അനു പറഞ്ഞു.
ഈ വര്ഷം നിരവധി ചിത്രങ്ങളാണ് അനുവിന്റേതായി റിലീസിംഗിന് ഒരുങ്ങുന്നത്. മമ്മൂട്ടിയുടെ ബിഗ്ബജറ്റ് ചിത്രം മാമാങ്കമാണ് ഇതില് പ്രധാനപ്പെട്ടത്. ടൊവീനോയ്ക്കൊപ്പം ആന്ഡ് ദ് ഓസ്കര് ഗോസ് ടുവിലും ദിലീപിന്റെ കൂടെ ശുഭരാത്രിയിലും അനു സിത്താര നായികയായി എത്തുന്നു. ഇതില് ‘ആന്ഡ് ദ് ഓസ്കര് ഗോസ് ടു’ ജൂണ് 21 ന് തിയേറ്ററുകളിലെത്തും.