തനിക്ക് മണ്ഡലം മാറിയതല്ല, ഇതാണ് എൻ്റെ രീതി: മണ്ഡലം മാറി വോട്ട് ചോദിച്ച സംഭവത്തിൽ വിശദീകരണവുമായി കണ്ണന്താനം
എറണാകുളം മണ്ഡലത്തിനു പകരം ചാലക്കുടി മണ്ഡലത്തിൽ വോട്ട് ചോദിച്ച സംഭവം വിവാദമായതിന് പിന്നാലെ വിശദീകരണവുമായി എറണാകുളത്തെ ബിജെപി സ്ഥാനാർത്ഥി അൽഫോൺസ് കണ്ണന്താനം. തനിക്ക് മണ്ഡലം മാറിപ്പോയതല്ലെന്നും ഇതാണ് തൻ്റെ രീതിയെന്നും അദ്ദേഹം പറഞ്ഞു.
താൻ മണ്ഡലം മാറി വോട്ട് ചോദിച്ചു എന്ന തരത്തിൽ പ്രചാരണമുണ്ടായി. തനിക്കു മണ്ഡലം മാറിയതല്ല, പല മണ്ഡലങ്ങളിലും താൻ പോയി വോട്ട് അഭ്യർഥിക്കാറുണ്ട്. അതു തനിക്ക് വേണ്ടിയല്ലെന്നും ബിജെപിക്ക് വോട്ട് ചെയ്യണമെന്നാണെന്നും അദ്ദേഹം പറഞ്ഞു.
കണ്ണന്താനത്തിൻ്റെ അമളി സോഷ്യൽ മീഡിയയിൽ വൻ ചർച്ചകൾക്കാണ് വഴിയൊരുക്കിയത്. സോഷ്യൽ മീഡിയ ട്രോളുകൾക്കെതിരെയും കണ്ണന്താനം രംഗത്തെത്തി. സംസ്ഥാനത്ത് തൊഴിലില്ലായ്മ വർധിച്ചിരിക്കുന്ന സാഹചര്യത്തിൽ ഒരു തൊഴിലുമില്ലാത്ത ചെറുപ്പക്കാരാണു തന്നെ സമൂഹമാധ്യമങ്ങളിലൂടെ പരിഹസിക്കുന്നതെന്നു അദ്ദേഹം പറഞ്ഞു.