കെ മുരളീധരൻ തോൽക്കും; വട്ടിയൂര്ക്കാവ് നിമയസഭാ മണ്ഡലത്തില് ഉപതെരഞ്ഞെടുപ്പുണ്ടാകില്ലെന്ന് കുമ്മനം
വടകരയില് യുഡിഎഫ് സ്ഥാനാര്ഥി കെ മുരളീധന് തോൽക്കുമെന്ന് തിരുവനന്തപുരത്തെ ബിജെപി സ്ഥാനാര്ഥി കുമ്മനം രാജശേഖരന്. മുരളീധരൻ ജയിച്ച് വട്ടിയൂര്ക്കാവ് നിമയസഭാ മണ്ഡലത്തില് ഉപതെരഞ്ഞെടുപ്പ് ഉണ്ടാവുമെന്ന് കരുതുന്നില്ലെന്നും ഈ തെരഞ്ഞെടുപ്പില് മത്സരിക്കുന്ന എംഎല്എമാരില് ആരും ജയിക്കില്ലെന്നും കുമ്മനം പറഞ്ഞു.
വട്ടിയൂര്ക്കാവില് ബിജെപിയെ തോല്പ്പിക്കാനായി വോട്ടുമറിച്ചവരാണ് സിപിഎം എന്നും അങ്ങനെയുള്ള സിപിഎമ്മിന് ബിജെപി വോട്ടുമറിക്കുമെന്ന് ആരോപിക്കാനുള്ള യോഗ്യത എന്താണെന്ന് കുമ്മനം ചോദിച്ചു. വട്ടിയൂര്ക്കാവില് എങ്ങനെയാണ് സിപിഎം സ്ഥാനാര്ഥി മൂന്നാം സ്ഥാനത്തേക്കു പോയതെന്ന് എല്ലാവര്ക്കും അറിയാമെന്നും കുമ്മനം പറഞ്ഞു.
ഈ തെരഞ്ഞെടുപ്പിലും അത്തരം വോട്ടുമറിക്കല് പ്രതീക്ഷിക്കുന്നുണ്ട്. സിപിഎം നിലനില്പ്പിനുവേണ്ടി ഇങ്ങനെ ചെയ്യുന്നതെന്ന് കുമ്മനം പറഞ്ഞു. കക്ഷത്തില് ഉള്ളതു പോവാതെ ഉത്തരത്തില് ഉള്ളത് എടുക്കാനാണ് എംഎല്എമാരെ ലോക്സഭാ തെരഞ്ഞെടുപ്പില് മത്സരിപ്പിക്കുന്നത്. ഈ തെരഞ്ഞെടുപ്പില് മത്സരിക്കുന്ന എംഎല്എമാര് എല്ലാം തോല്ക്കാനുള്ളവരാണെന്നും കുമ്മനം വ്യക്തമാക്കി.