തനിക്ക് ലോക്സഭയിലേക്ക് പോയാൽ കൊള്ളാമെന്നുണ്ട്; നിഷാ മാണി മത്സരിക്കുമെന്നുള്ളത് പ്രചരണം മാത്രം: മാണിയെ പ്രതിസന്ധിയിലാക്കി പിജെ ജോസഫ്
ലോക്സഭയിലേക്ക് തനിക്ക് പോയാൽ കൊള്ളാമെന്നുണ്ടെന്നും രണ്ട് സീറ്റ് വേണമെന്ന ആവശ്യത്തിൽ ഉറച്ചു നിൽക്കുന്നുവെന്നും കേരള കോൺഗ്രസ് എം പാർട്ടി വർക്കിംഗ് ചെയർമാൻ പി.ജെ. ജോസഫ്. 1984ൽ കേരള കോണ്ഗ്രസിന് മൂന്ന് സീറ്റുകൾ ലഭിച്ചിരുന്നു. 74ൽ രണ്ട് സീറ്റുകളും ലഭിച്ചിരുന്നു. ആവശ്യം അംഗീകരിക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.
കോട്ടയത്തിന് പുറമേ ഇടുക്കിയോ ചാലക്കുടിയോ കിട്ടണം. ഇക്കാര്യം കോണ്ഗ്രസ് അധ്യക്ഷൻ രാഹുൽ ഗാന്ധിയെ അറിയിച്ചിട്ടുണ്ടെന്നും അദ്ദേഹം വാർത്താസമ്മേളനത്തിൽ പറഞ്ഞു.
നിഷാ മാണി കോട്ടയത്ത് മത്സരിക്കുമോ എന്ന മാധ്യമങ്ങളുടെ ചോദ്യത്തിന് ഇല്ലെന്നും ഇത് വെറും പ്രചരണം മാത്രമാണെന്നും അദ്ദേഹം പറഞ്ഞു. സ്ഥാനാർഥികളെ സംബന്ധിച്ച് പാർട്ടി ചർച്ച ചെയ്തു തീരുമാനിക്കുമെന്നും ജോസഫ് കൂട്ടിച്ചേർത്തു.