കാസർഗോട്ട് കൊല്ലപ്പെട്ട യൂത്ത് കോൺഗ്രസ് പ്രവർത്തകരുടെ വീടുകൾ മുഖ്യമന്ത്രി സന്ദർശിക്കുമെന്ന് സൂചന
കാസർഗോട്ടെ പെരിയകല്യോട്ട് കൊല്ലപ്പെട്ട കൃപേഷിന്റെയും ശരത് ലാലിന്റെയും വീടുകൾ മുഖ്യമന്ത്രി പിണറായി വിജയൻ സന്ദർശിച്ചേക്കുമെന്നു സൂചനകൾ. സിപിഎം ജില്ലാ നേതൃത്വം ഡിസിസിയുമായി ബന്ധപ്പെട്ടെന്നാണ് വിവരം. എന്നാൽ ഇതുസംബന്ധിച്ച് സ്ഥിരീകരണം വന്നിട്ടില്ല.
പെരിയയില് കൊല്ലപ്പെട്ട യൂത്ത് കോണ്ഗ്രസ് പ്രവര്ത്തകരുടെ വീട് സന്ദര്ശിക്കാന് മുഖ്യമന്ത്രി താത്പര്യം അറിയിച്ചിരുന്നു. ഇത് സംബന്ധിച്ച് സിപിഎം ജില്ലാ നേതൃത്വം കോണ്ഗ്രസ് നേതാക്കളുമായി ചര്ച്ചചെയ്തു. എന്നാല് പ്രദേശത്തെ പ്രവര്ത്തകര് എങ്ങനെ പ്രതികരിക്കുമെന്ന് അറിയില്ലെന്ന് ഡിസിസി നേതൃത്വം ജില്ലാ നേതാക്കളെ അറിയിച്ചു.
അതിനിടെ, മുഖ്യമന്ത്രി വീട് സന്ദർശിക്കണമെന്ന് കൊല്ലപ്പെട്ട കൃപേഷിന്റെ അച്ഛൻ കൃഷ്ണൻ ആവശ്യപ്പെട്ടു. അദ്ദേഹത്തോട് സിബിഐ അന്വേഷണം ആവശ്യപ്പെടുമെന്നും കൃഷ്ണൻ പറഞ്ഞു.
കഴിഞ്ഞ ദിവസം വീട്ടിലെത്തിയ റവന്യൂ മന്ത്രി ഇ ചന്ദ്രശേഖരനോടും ഇതേ ആവശ്യം കൃഷ്ണന് ഉന്നയിച്ചിരുന്നു.