ഒരു കോഴിയുടെ വില ഒന്നര ലക്ഷം രൂപ; പക്ഷെ വിൽക്കാൻ ഉടമ തയ്യാറല്ല
ഒരു പൂവൻ കോഴിയുടെ വില ഒന്നര ലക്ഷം രൂപ. ദിണ്ഡുക്കൽ ജില്ലയിലെ വടമധുരയ്ക്കു സമീപം അയ്യലൂരിൽ തമിഴ്നാട് അസീൽ ഓർഗനൈസേഷന്റെ നേതൃത്വത്തിൽ നടന്ന പൂവൻകോഴികളുടെ പ്രദർശനത്തിലാണ് ഒരു കോഴിക്ക് ഒന്നര ലക്ഷം രൂപവരെ വിലയെത്തിയത്. പക്ഷെ ഉടമസ്ഥൻ നത്തം ഗാന്ധി കോഴിയെ വിൽക്കാൻ തയാറായില്ല.
നത്തം ഗാന്ധിയുടെ മയിൽ വിഭാഗത്തിൽപെടുന്ന പൂവൻ കോഴിക്കാണ് കാണികളിൽ ഒരാൾ ഒന്നരലക്ഷം രൂപ വരെ വില പറഞ്ഞത്. കോമപ്പെട്ടി ചിന്നപ്പൻ എന്നയാളിൽനിന്നു മാസങ്ങൾക്കുമുൻപ് 90,000 രൂപ വിലയ്ക്ക് നത്തം ഗാന്ധി വാങ്ങിയ പൂവൻകോഴിക്കാണ് ഒന്നര ലക്ഷം രൂപ വില പറഞ്ഞത്. കഴിഞ്ഞ വർഷം നടന്ന പ്രദർശനത്തിൽ ഒന്നര ലക്ഷം രൂപയ്ക്കു ബംഗളൂരു സ്വദേശി വാങ്ങിയ മയിൽ ഇനത്തിൽപെട്ട കോഴിയെ മൂന്നുലക്ഷം രൂപയ്ക്ക് ഒമാൻ സ്വദേശിക്കു മറിച്ചുവിറ്റിരുന്നു.
അന്യംനിന്നുപോകുന്ന പാരന്പര്യ പൂവൻകോഴി ഇനങ്ങളെ സംരക്ഷിക്കുന്നതിനാണ് ഇത്തരം പ്രദർശനങ്ങൾ സംഘടിപ്പിക്കുന്നത്. എട്ടു വർഷം മുന്പുവരെ നല്ല ബ്രീഡിലുള്ള പൂവൻ കോഴികൾ ഉണ്ടായിരുന്നെന്നും, ഇന്ന് ഇതെല്ലാം അന്യമാകുകയാണെന്നുമാണ് സംഘാടകർ പറയുന്നത്. ഇത്തവണ തമിഴ്നാട്ടിൽനിന്നും സമീപ സംസ്ഥാനങ്ങളിൽനിന്നും കീരി, മയിൽ, കൊക്കുവെള്ള, എണ്ണക്കറുപ്പ്, കാകം തുടങ്ങി വിവിധ ഇനങ്ങളിലുള്ള 452 പൂവൻകോഴികളെ പ്രദർശനത്തിൽ പങ്കെടുപ്പിച്ചു.
പ്രദർശനത്തിലെ മികച്ച പൂവൻ കോഴികൾക്ക് സ്വർണ നാണയങ്ങൾ, വെള്ളിനാണയങ്ങൾ സമ്മാനമായി ലഭിച്ചു. കോഴികളുമായി പങ്കെടുത്ത മുഴുവൻ ആളുകൾക്കും സർട്ടിഫിക്കറ്റുകൾ നല്കി. കേരളം, തമിഴ്നാട്, ആന്ധ്രപ്രദേശ്, ഒറീസ, പശ്ചിമ ബംഗാൾ എന്നിവിടങ്ങളിൽനിന്നുമാണ് ഇത്തവണ കോഴികളെ പ്രദർശനത്തിനായി എത്തിച്ചത്.