രക്തപരിശോധനയിലൂടെ 14ാം മിനിറ്റില് ഹൃദയാഘാതം കണ്ടു പിടിക്കാം: ഉപകരണം തിരുവനന്തപുരം മെഡിക്കല് കോളേജ് ആശുപത്രിയിലെത്തി
രക്തപരിശോധനയിലൂടെ പതിനാലാം മിനിറ്റില് ഹൃദയാഘാതം കണ്ടു പിടിക്കാനുള്ള ഉപകരണമായ ‘കോബാസ് എച്ച് 232 എ’ തിരുവനന്തപുരം മെഡിക്കല് കോളേജ് ആശുപത്രിയിലുമെത്തി. രോഗികളുടെ തിക്കും തിരക്കും കാരണം കൃത്യസമയത്ത് പരിശോധനകള് പൂര്ത്തിയാക്കി ചികിത്സ ലഭ്യമാക്കാന് പാടുപെടുന്ന ഡോക്ടര്മാര്ക്ക് ഈ ഉപകണം ഏറെ സഹായകമായിരിക്കും.
നിലവില് വന്കിട ആശുപത്രികളില് മാത്രമേ ഈ സൗകര്യമുള്ളൂ. പുതിയ ഉപകരണം ചികിത്സാ രംഗത്തെ വിപ്ലവകരമായ മാറ്റമായാണു ഡോക്ടര്മാര് കരുതുന്നത്. സാധാരണ ഹൃദയാഘാതം കണ്ടുപിടിക്കണമെങ്കില് രക്തം ലാബില് നല്കിയ ശേഷം നാലു മണിക്കൂര് കാത്തിരിക്കണമായിരുന്നു.
മെഡിക്കല് കോളേജ് ആശുപത്രിയുടെ അത്യാഹിത വിഭാഗത്തിലെത്തുന്ന രോഗികള്ക്ക് ഈ ഉപകരണത്തിന്റെ പ്രയോജനം ലഭിക്കും. ആശുപത്രി വികസന സമിതിയുടെ ലാബിലാണു രക്തം പരിശോധിക്കുക. ആധുനികമായി പോയിന്റ് ഓഫ് കെയര് എന്ന സാങ്കേതിക വിദ്യ ഉപയോഗിച്ചാണു ഇത് പ്രവര്ത്തിക്കുക.