രജനീകാന്ത് അജിത് ആരാധകര് തമ്മില് സംഘര്ഷം: രണ്ടു പേര്ക്ക് കുത്തേറ്റു
10 January 2019
തമിഴ്നാട്ടിലെ വെല്ലൂരില് രജനീകാന്ത് അജിത് ആരാധകര് തമ്മില് സംഘര്ഷം. രണ്ടു പേര്ക്ക് കുത്തേറ്റു. ഇതില് ഒരാളുടെ നില ഗുരുതരമാണ്. വ്യാഴാഴ്ച രാവിലെയാണ് സംഭവമുണ്ടായത്. രജനീകാന്തിന്റെ ‘പേട്ട’, അജിത്തിന്റെ ‘വിശ്വാസം’ എന്നീ ചിത്രങ്ങളുടെ റിലീസ് തീയതി ഇന്നായിരുന്നു. പുലര്ച്ചെ നടന്ന പ്രദര്ശനശേഷം ഉണ്ടായ ആഘോഷ പരിപാടികള്ക്കിടെയാണ് ഇരുവരുടെയും ആരാധകര് തമ്മില് സംഘര്ഷമുണ്ടായത്.
അതിനിടെ, അജിത് ചിത്രമായ വിശ്വാസം കാണാന് പണം നല്കിയില്ലെന്നാരോപിച്ച് തമിഴ്നാട്ടിലെ കാഠ്പാഠിയില് മകന് അച്ഛനെ തീ കൊളുത്തി കൊലപ്പെടുത്താന് ശ്രമിച്ചു. 45 വയസുകാരന് പാണ്ഡ്യനെയാണ് മകന് അജിത്ത് കുമാര് കൊലപ്പെടുത്താന് ശ്രമിച്ചത്. പൊള്ളലേറ്റ പാണ്ഡ്യന്റെ നില ഗുരുതരമാണ്. അജിത്ത് കുമാറിനെ പൊലീസ് അറസ്റ്റ് ചെയ്തു.