‘മൂല്യബോധമുള്ള സിനിമ; മോഹന്ലാലിന്റെ കണ്ണുകളില് വരെ അഭിനയം തുളുമ്പിയിട്ടുണ്ട്’: ഒടിയനെ പ്രശംസിച്ച് മന്ത്രി ജി സുധാകരന്
റിലീസിനു മുന്പ് വന് വരവേല്പ്പും റിലീസ് ശേഷം വലിയ വിമര്ശനവും ഏറ്റുവാങ്ങേണ്ടി വന്ന മലയാള ചിത്രമാണ് ഒടിയന്. സിനിമ റിലീസ് ചെയ്ത് ഒരാഴ്ച പിന്നിടുമ്പോള് കഥ മാറുകയാണ്. വിമര്ശകരുടെ വായടപ്പിക്കുംവിധമാണ് തീയറ്ററുകളിലേക്കു ജനം എത്തുന്നത്.
ഇതിനിടെ ചിത്രത്തെ പുകഴ്ത്തി മന്ത്രി ജി സുധാകരന് രംഗത്തെത്തി. അഭിനയമികവും സ്വാഭാവിക ശൈലിയും കൊണ്ട് മോഹന്ലാലും മഞ്ജു വാര്യരും പ്രകാശ് രാജും ഉള്പ്പെടെയുള്ള കലാകാരന്മാര് അതിമനോഹരമാക്കിയിട്ടുള്ള മികച്ച ചിത്രമാണ് ഒടിയനെന്ന് മന്ത്രി ഫേസ്ബുക്കില് കുറിച്ചു.
പ്രേക്ഷകരെ ആദ്യാവസാനം പിടിച്ചിരുത്തും വിധം ഭൂതകാലത്തെയും വര്ത്തമാനകാലത്തെയും സമചിത്തമായി സമ്മേളിപ്പിച്ച് കൊണ്ടാണ് കഥ നീങ്ങുന്നതെന്നും മൂല്യബോധമുള്ള സിനിമയാണിതെന്നും മന്ത്രി പറഞ്ഞു.
ഫേസ്ബുക്ക് പോസ്റ്റിന്റെ പൂര്ണ്ണരൂപം
ഡിസംബര് 14ന്റെ കേരള ഹര്ത്താലിനെ അതീജിവിച്ചാണ് മലയാളി പ്രേക്ഷകര് കാത്തിരുന്ന ഒടിയന് എന്ന സിനിമ പ്രേക്ഷകരുടെ മുന്നില് എത്തിയത്. പക്ഷേ പെട്ടെന്ന് തന്നെ ചിത്രത്തിന് എതിരെ കുപ്രചരണ വാര്ത്തകള് കേട്ടു. അതുകൊണ്ട് സിനിമ ഒന്ന് കാണണമെന്ന് തോന്നി. ചിത്രം എനിക്ക് വളരെ ഇഷ്ടപ്പെട്ടു.
കെ.ഹരികൃഷ്ണന് വ്യത്യസ്തമായ കഥയൊരുക്കി വി.എ.ശ്രീകുമാര് മേനോന് അതിമനോഹരമായി സംവിധാനം ചെയ്ത്, അഭിനയമികവും സ്വാഭാവിക ശൈലിയും കൊണ്ട് മോഹന്ലാലും മഞ്ജു വാരിയരും പ്രകാശ് രാജും ഉള്പ്പെടെയുള്ള കലാകാരന്മാര് അതിമനോഹരമാക്കിയിട്ടുള്ള മികച്ച ചിത്രം.
എം.ജയചന്ദ്രന്റെ മികച്ച സംഗീതവും പ്രഭാവര്മ്മയുടെ ഗാനവും ഷാജി കുമാറിന്റെ ഛായാഗ്രഹണവും ചിത്രത്തെ ആസ്വാദ്യകരമാക്കിയിട്ടുണ്ട്. ഒടിയന് മാണിക്യന് എന്ന കഥാപാത്രത്തിന്റെ യൗവ്വനവും വാര്ദ്ധക്യവും ചിത്രത്തില് അവതരിപ്പിക്കുന്നതില് മോഹന്ലാല് നല്ല ശാരീരിക വഴക്കം പ്രകടിപ്പിച്ചിട്ടുണ്ട്.
ഈ സിനിമയില് മോഹന്ലാലിന്റെ കണ്ണുകളില് വരെ അഭിനയം തുളുമ്പിയിട്ടുണ്ട് എന്ന് മറുചിന്തയില്ലാതെ വിശേഷിപ്പിക്കാം. മഞ്ജുവാര്യരുടെതും തുല്യതയില്ലാത്ത അഭിനയമികവ് തന്നെ. സിനിമയിലാകെ വളരെ സന്ദര്ഭോചിതമായി സംഭാഷണം ഉള്ക്കൊള്ളിക്കാന് കഴിഞ്ഞത് പ്രേക്ഷകരെ ചിന്തിപ്പിക്കുന്നുണ്ട്. പ്രേക്ഷകരെ ആദ്യാവസാനം പിടിച്ചിരുത്തും വിധം ഭൂതകാലത്തെയും വര്ത്തമാനകാലത്തെയും സമചിത്തമായി സമ്മേളിപ്പിച്ച് കൊണ്ടാണ് കഥ നീങ്ങുന്നത്. മൂല്യബോധമുള്ള സിനിമയാണ്.