കേരളത്തിലെ പ്രളയം 2018ല് ലോകം കണ്ട മഹാദുരന്തം
2018ല് ലോകം കണ്ട മഹാദുരന്തമാണ് കേരളത്തിലെ പ്രളയമെന്ന് ലോക കാലാവസ്ഥാ സംഘടന (ഡബ്ല്യു.എം.ഒ.) റിപ്പോര്ട്ട്. പ്രളയത്തെ തുടര്ന്നുണ്ടായ ജീവഹാനി കണക്കാക്കിയാണ് ഡബ്ല്യു.എം.ഒ ദുരന്തത്തിന്റെ വ്യാപ്തി കണക്കാക്കിയിട്ടുള്ളത്. സാമ്പത്തികനഷ്ടത്തിന്റെ കണക്കില് ആഗോള ദുരന്തങ്ങളില് നാലാമതാണ് ഓഗസ്റ്റില് കേരളത്തെ ബാധിച്ച മഹാപ്രളയമെന്നും വ്യാഴാഴ്ച പുറത്തുവിട്ട റിപ്പോര്ട്ട് ചൂണ്ടിക്കാട്ടുന്നു.
പ്രളയം 54 ലക്ഷംപേരെയാണ് നേരിട്ട് ബാധിച്ചത്. 223 പേര് മരിച്ചു. 14 ലക്ഷം പേര്ക്ക് വീട് നഷ്ടമായി. സംസ്ഥാനത്തിന് 430 കോടി യുഎസ് ഡോളര് (30,000 കോടി രൂപ) സാമ്പത്തിക നഷ്ടമുണ്ടായതായും റിപ്പോര്ട്ട് ചൂണ്ടിക്കാട്ടുന്നു. 1924നുശേഷം കേരളംകണ്ട ഏറ്റവുംവലിയ പ്രളയമായിരുന്നു ഇത്.
അതേസമയം, 483 പേര് മരിച്ചതായാണ് സംസ്ഥാനത്തിന്റെ കണക്ക്. ജപ്പാന്, കൊറിയ, നൈജീരിയ എന്നിവിടങ്ങളിലുണ്ടായ പ്രളയവും പാകിസ്താനിലുണ്ടായ ഉഷ്ണതരംഗവുമാണ് ആള്നാശത്തിന്റെ കാര്യത്തില് കേരളത്തിന് തൊട്ടുപിന്നിലുള്ളത്. സെപ്റ്റംബറില് യു.എസിലുണ്ടായ ഫ്ളോറന്സ് ചുഴലിക്കാറ്റാണ് ഏറ്റവുംവലിയ സാമ്പത്തിക നഷ്ടമുണ്ടാക്കിയത്. 35,000 കോടി രൂപയുടെ നഷ്ടമാണ് കണക്കാക്കുന്നത്.
ആള്നാശത്തില് കേരളത്തിന് തൊട്ടുപിന്നിലുള്ള ജപ്പാനില് ജൂണ് ജൂലായ് മാസങ്ങളിലുണ്ടായ പ്രളയത്തില് 230 പേര് മരിച്ചു. സെപ്റ്റംബറില് നൈജീരിയയിലുണ്ടായ പ്രളയത്തില് നൂറിലേറെപ്പേര് മരിച്ചു. ഉത്തരകൊറിയയിലെ വെള്ളപ്പൊക്കത്തില് 76 പേര് മരിച്ചു. 75 പേരെ കാണാതായി. പാകിസ്താനിലെ ഉഷ്ണതരംഗത്തില് 65 പേരാണ് മരിച്ചത്.
2017ല് ഇന്ത്യയിലാകെ മഴക്കെടുതികളിലും വെള്ളപ്പൊക്കത്തിലുമുണ്ടായതിലുമേറെയാണ് കേരളത്തിലെ മഹാപ്രളയത്തിലുണ്ടായ നഷ്ടം. വീട്, കൃഷിനാശമുള്പ്പെടെ 18,279 കോടി രൂപയുടെ നഷ്ടമാണ് ഇന്ത്യയില് കഴിഞ്ഞവര്ഷം ഉണ്ടായതെന്ന് കേന്ദ്ര ജലക്കമ്മിഷന് വിലയിരുത്തുന്നു. എന്നാല്, കേരളത്തില് മഹാപ്രളയമുണ്ടാക്കിയത് 20,000 കോടിരൂപയുടെ നഷ്ടമാണെന്നാണ് ജലക്കമ്മിഷന് വിലയിരുത്തല്.
എന്നാല്, നഷ്ടം ഇതിലെത്രയോ അധികമാണെന്ന് ലോകബാങ്കും യു.എന്നും സംസ്ഥാനസര്ക്കാരും കണക്കാക്കുന്നു. ലോകബാങ്കും യു.എന്നും തയ്യാറാക്കിയ റിപ്പോര്ട്ടില് 31,000 കോടിരൂപയുടെ നഷ്ടം സൂചിപ്പിക്കുന്നു. യഥാര്ഥ നഷ്ടം ഇതിലുമേറെയാണെന്ന് സംസ്ഥാനസര്ക്കാര് വാദിക്കുന്നു.
സംസ്ഥാനത്തെ അഞ്ച് ജില്ലകളിലെ 33 ലക്ഷംപേരുടെ തൊഴിലവസരങ്ങളെ പ്രളയം പ്രതിസന്ധിയിലാക്കിയെന്ന് ക്ലൈമറ്റ് ട്രെന്ഡ്സ് എന്ന കാലാവസ്ഥാ ഗവേഷണസംഘടന പുറത്തുവിട്ട റിപ്പോര്ട്ടില് പറയുന്നു. കാലാവസ്ഥാമാറ്റമാണ് കേരളത്തില് അസാധാരണ മഴയ്ക്കിടയാക്കിയതെന്ന് കേന്ദ്ര കാലാവസ്ഥാവകുപ്പും കഴിഞ്ഞദിവസം റിപ്പോര്ട്ടു ചെയ്തിരുന്നു.