ഇന്തോനീഷ്യയിലെ സുനാമി;വിമാനത്താവളം അടച്ചു;മരണസംഖ്യ ഉയരുന്നു
ജക്കാര്ത്ത: ഇന്ഡോനീഷ്യയിലെ സുലവേസി ദ്വീപിലുണ്ടായ സുനാമിയില് ചുരുങ്ങിയത് 30 പേര് മരിച്ചു. വെള്ളിയാഴ്ചയാണ് 7.5 രേഖപ്പെടുത്തിയ ഭൂകമ്പത്തേത്തുടര്ന്ന് കടലോര നഗരമായ പാലുവില് വന് തിരമാലകള് ആഞ്ഞടിച്ചത്. ഒട്ടേറെ വീടുകള് ഒഴുകിപ്പോയി.
ഭൂചലനത്തിന് പിന്നാലെ ഇന്തോനേഷ്യന് ദുരന്ത നിവാരണ ഏജന്സി സുനാമി മുന്നറിയിപ്പ് നല്കിയിരുന്നു. എന്നാല്, അരമണിക്കൂറിനകം പിന്വലിക്കുകയും ചെയ്തു. തുടര് ചലനങ്ങള് 6.7 വരെ രേഖപ്പെടുത്തി. തീരത്തേക്ക് സുനാമി തിരമാലകളടിക്കുന്ന ദൃശ്യം ഇന്തോനേഷ്യന് ടി.വി. പുറത്തുവിട്ടു.
ഭൂചലനത്തെ തുടര്ന്ന് പാലുവിലെ വിമാനത്താവളം 24 മണിക്കൂര് നേരത്തേക്ക് പ്രവര്ത്തനം നിര്ത്തിയിരിക്കയാണ്.
സുലവേസിയില് ഒട്ടേറെ വീടുകള് നിലംപതിച്ചിട്ടുണ്ട്. ദ്വീപിലെ മധ്യപടിഞ്ഞാറന് മേഖലയിലുള്ളവരോട് മറ്റിടങ്ങളിലേക്ക് മാറാന് അധികൃതര് ആവശ്യപ്പെട്ടു. സുലവേസിയുടെ സമീപ ദ്വീപായ ലോമ്പോക്കില് മാസങ്ങള്ക്കുമുമ്പുണ്ടായ ഭൂചലനത്തില് 500ഓളം പേര് കൊല്ലപ്പെട്ടിരുന്നു.