നടന് ദിലീപിനെയും ഇതുപോലെയൊരു പരാതിയുടെ പേരിലാണ് അറസ്റ്റ് ചെയ്തത്; തുറന്നടിച്ച് സംവിധായകന് മേജര് രവി
പീഡനകേസില് ബിഷപ്പ് ഫ്രാങ്കോ മുളയ്ക്കലിന്റെ അറസ്റ്റ് വൈകുന്നതില് പ്രതിഷേധിച്ച് കന്യാസ്ത്രീകള് നടത്തിവരുന്ന സമരത്തിന് ഐക്യദാര്ഡ്യം പ്രഖ്യാപിച്ച് സംവിധായകന് മേജര് രവി. ബിഷപ്പ് ഫ്രാങ്കോ മുളയ്ക്കല് എത്ര വലിയ കൊമ്പത്തിരിക്കുന്ന ആളാണെങ്കിലും ശരി അയാള്ക്കെതിരെ പരാതി ലഭിച്ചിട്ടുണ്ടെങ്കില് നിയമനടപടി സ്വീകരിക്കണമെന്ന് മേജര് രവി പറഞ്ഞു.
ഒരാളെ രക്ഷിക്കാനായി ഒരു സമൂഹത്തിനെ ബലിയാടാക്കുന്ന പ്രവൃത്തിയാണ് നടക്കുന്നത്. ഇരകളാകപ്പെട്ടവര്ക്ക് വേണ്ട നീതി അവര്ക്ക് കിട്ടിയേ പറ്റൂവെന്നും മേജര് രവി വ്യക്തമാക്കി. ‘നടന് ദിലീപിനെയും ഇതുപോലെയൊരു പരാതിയുടെ പേരിലാണ് അറസ്റ്റ് ചെയ്യുന്നത്.
ആ സമയത്ത് ദിലീപിനും പറയാമായിരുന്നു എനിക്ക് എന്റെ സംഘടന ഉണ്ട്, അമ്മ. ആ സംഘടന അന്വേഷണം നടത്തിയിട്ട് എന്നെ അറസ്റ്റ് ചെയ്താല് മതിയെന്ന്. അതാരും ചെയ്തില്ല. അപ്പോള് ഇതുപോലെയുള്ള അക്രമങ്ങള്ക്ക് സംഘടനകളുടെ ശക്തി ഉപയോഗിച്ച് പിന്തുണയ്ക്കാന് പാടില്ല’. മേജര് രവി പറഞ്ഞു.