Kerala

പി.സി ജോർജിനെ ‘വെള്ളം കുടിപ്പിച്ച്’ അർണബ് ഗോസ്വാമിയുടെ റിപ്പബ്ലിക് ടിവി

ജലന്ധർ ബിഷപ്പ് ഫ്രാങ്കോ മുളയ്ക്കൽ പീഡനത്തിനിരയാക്കിയ കന്യാസ്ത്രീയെ വാർത്താ സമ്മേളനത്തിൽ അധിക്ഷേപിച്ച പൂഞ്ഞാർ എം.എൽ.എ പി.സി ജോർജിനെ പൊളിച്ചടുക്കി അർണബ് ഗോസ്വാമിയുടെ റിപ്പബ്ലിക് ടി.വി. പി.സി ജോർജിന്റെ ആരോപണവുമായി ബന്ധപ്പെട്ട് റിപ്പബ്ലിക്ക് ടി.വി നടത്തിയ ചാനൽ ചർച്ചയിലാണ് അവതാരക എം.എൽ.എയെ പൊളിച്ചടുക്കിയത്.

പീഡനത്തിനിരയായ കന്യാസ്ത്രീയെ അപമാനിച്ച താങ്കളുടെ പരാമർശത്തിൽ ക്ഷമാപണം നടത്തുന്നുണ്ടോ എന്ന ചോദ്യത്തിന് പി.സി ജോർജ് ചിരിച്ചുകൊണ്ട് മറുപടി പറഞ്ഞതാണ് അവതാരകയെ പ്രകോപിപ്പിച്ചത്. നിങ്ങൾക്ക് എങ്ങനെയാണ് ഇത്തരം ഒരു പരാമാർശം നടത്തിയിട്ട് ഇങ്ങനെ ചിരിച്ചുകൊണ്ട് മറുപടി പറയാൻ കഴിയുന്നതെന്ന് അവതാരക ചോദിച്ചു.

എന്നാൽ താൻ കോട്ടയത്ത് വിളിച്ച് ചേർത്ത വാർത്ത സമ്മേളനത്തിൽ പറഞ്ഞ കാര്യത്തിൽ ഉറച്ച് നിൽക്കുന്നതായി പി.സി ജോർജ് പറഞ്ഞു. എന്നാൽ ഇതിനെതിരെ വളരെ രോഷത്തോടെയാണ് വാർത്ത അവതാരക പ്രതികരിച്ചത്. നിങ്ങൾ എങ്ങനെയാണ് ഒരു സ്ത്രീയെ കുറിച്ച് ഇത്തരത്തിൽ പരാമർശം നടത്തുക. അവർ പീഡനത്തിൽ നിന്നും അതിജീവിച്ചുവരുന്ന ഒരു സ്ത്രീയാണ്. അവരോട് നിങ്ങൾ മാപ്പ് പറയണമെന്നും അവതാരക ആവശ്യപ്പെട്ടു.

അതേസമയം, പരാതി ഉണ്ടായിരുന്നെങ്കിൽ കന്യാസ്ത്രീ ആദ്യ പീഡനം നടന്നപ്പോൾ പറയണമായിരുന്നു. പന്ത്രണ്ട് തവണ പീഡിപ്പിക്കപ്പെട്ടിട്ടും പതിമൂന്നാം തവണ മാത്രം പരാതി നൽകിയത് എന്തുകൊണ്ടാണെന്നും ജോർജ് ചാനൽ ചർച്ചയിലും ആവർത്തിച്ചു. എന്നാൽ ഇതിന് അവതാരകയുടെ മറുപടി ഇങ്ങനെയായിരുന്നു.

നിങ്ങൾ ഒരു എം.എൽ.എയാണ്, ജനങ്ങൾ തിരഞ്ഞെടുത്തിട്ടാണ് നിങ്ങൾ നിയമ സഭയിൽ എത്തിയത്. ഒരു സ്ത്രീയെ നിങ്ങൾ ഇത്തരത്തിൽ അപമാനിക്കരുതായിരുന്നു. അതേസമയം, മലയാളം ചാനലുകളിൽ ചർച്ചയ്ക്കിരിക്കുന്ന പി.സി ജോർജിന്റെ ആർജവം ഇന്നലെ നടന്ന ചർച്ചയിൽ കാണാൻ കഴിഞ്ഞില്ല.