ചരിത്ര വിധി പ്രഖ്യാപിച്ച് സുപ്രീം കോടതി; പരസ്പര സമ്മതത്തോടെയുള്ള സ്വവര്ഗരതി ക്രിമിനല് കുറ്റമല്ല
ന്യൂഡല്ഹി: സ്വവര്ഗ ലൈംഗികത ക്രിമിനല് കുറ്റമല്ലെന്ന് സുപ്രീംകോടതി വിധി. ലോകം ഉറ്റുനോക്കിയിരുന്ന വിധിയിലൂടെ 157 വര്ഷം പഴക്കമുള്ള നിയമമാണ് സുപ്രീംകോടതി അസ്ഥിരപ്പെടുത്തിയത്. സ്വവര്ഗ ലൈംഗികത കുറ്റകരമായി കണക്കാക്കിയിരുന്ന ഭരണഘടനയിലെ 377ാം വകുപ്പ് ഇതോടെ ഇല്ലാതാകും.
ഐപിസി 377ലെ വ്യവസ്ഥ ഭരണഘടനാ വിരുദ്ധമാണ്. വകുപ്പ് യുക്തിഹീനവും ഏകപക്ഷീയവുമെന്ന് ഭരണഘടനാ ബെഞ്ച് നിരീക്ഷിച്ചു. വ്യത്യസ്ത വ്യക്തിത്വങ്ങള് അംഗീകരിക്കാന് സമൂഹം പക്വതയാര്ജിച്ചതായും സുപ്രീംകോടതി വ്യക്തമാക്കി. ചീഫ് ജസ്റ്റിസ് ദീപക് മിശ്ര അധ്യക്ഷനായ അഞ്ചംഗ ബെഞ്ചാണ് വിധി പ്രസ്താവിച്ചത്.
ജസ്റ്റിസുമാരായ എം എം ഖാന്വില്ക്കര്, ഇന്ദു മല്ഹോത്ര, ആര് എഫ് നരിമാന് എന്നിവരാണ് മറ്റ് അംഗങ്ങള്. ബെഞ്ചിന്റെ യോജിച്ചുള്ള വിധിയാണെന്ന് ദീപക് മിശ്ര വ്യക്തമാക്കി. ലിംഗ വ്യത്യാസമില്ലാതെ പങ്കാളിയെ തെരഞ്ഞെടുക്കാന് എല്ലാവര്ക്കും അവകാശമുണ്ടെന്ന് കേസില് വാദം കേള്ക്കുന്നതിനിടെ കോടതി പരാമര്ശം നടത്തിയിരുന്നു.
പൊതുസമൂഹത്തിന്റെ സദാചാരബോധം അടിസ്ഥാനമാക്കിയല്ല, ഭരണഘടനയിലൂന്നിയ സദാചാരബോധത്തിലാണ് കോടതി പ്രവര്ത്തിക്കുന്നതെന്നായിരുന്നു ചീഫ് ജസ്റ്റിസ് ദീപക് മിശ്ര വാദം കേള്ക്കുന്നതിനിടെ പ്രതികരിച്ചത്. ഇന്ത്യന്സമൂഹം സ്വവര്ഗാനുരാഗികളോടു തീക്ഷ്ണമായ വിവേചനം പുലര്ത്തുന്നുവെന്നു നിരീക്ഷിച്ച കോടതി, സമൂഹത്തിന്റെ മനോഭാവം കാരണം പലര്ക്കും യഥാര്ഥ ലൈംഗിക അഭിരുചി വെളിപ്പെടുത്താന് കഴിയുന്നില്ലെന്നും വ്യക്തമാക്കിയിരുന്നു.
നര്ത്തകി നവ്തേജ് സിങ് ജോഹര്, മാധ്യമപ്രവര്ത്തകന് സുനില് മെഹ്റ, വ്യവസായികളായ റിതു ഡാല്മിയ, അമന് നാഥ് തുടങ്ങിയവരാണു സ്വവര്ഗരതി ക്രിമിനല് കുറ്റമായി കാണുന്ന വകുപ്പു റദ്ദാക്കണമെന്നാവശ്യപ്പെട്ട് സുപ്രീംകോടതിയെ സമീപിച്ചത്. ഒരാളുടെ ലൈംഗികത എന്നത് ഭയത്തോടുകൂടി ആകരുത്.
ഞാന് എന്താണോ അത് തന്നെയാണ് ഞാന് എന്ന രീതിയില് ജീവിക്കാന് ഒരു വ്യക്തിയ്ക്ക് സാധിക്കണം. അതിന് ഭരണഘടനാപരമായ അവകാശമുണ്ട്. ഒരു ജീവിതത്തിന്റെ അര്ത്ഥം എന്നത് സ്വതന്ത്രമായി ജീവിക്കുക എന്നത് കൂടിയാണ്. ഭയത്തോടുകൂടി ജീവിക്കലല്ല എന്നും പ്രസ്താവത്തില് ചീഫ് ജസ്റ്റിസ് പറഞ്ഞു.
നിലവില് 1861ലെ ഇന്ത്യന് ശിക്ഷാനിയമപ്രകാരം സ്വവര്ഗരതി പത്തുവര്ഷം വരെ ശിക്ഷ ലഭിക്കാവുന്ന കുറ്റമാണ്. പ്രകൃതി നിയമത്തിനെതിരാണന്ന് ചൂണ്ടിക്കാട്ടിയാണ് 1861ല് സ്വവര്ഗ്ഗരതിയെ കുറ്റകരമാക്കിക്കൊണ്ടുള്ള നിയമം പ്രാബല്യത്തില് വരുന്നത്. ഈ നിയമം സ്വാതന്ത്രപ്രാപ്തിക്കു ശേഷവും തുടര്ന്നു. നിയമ കമ്മീഷന്റെ 172ാമത് റിപ്പോര്ട്ടില് നിയമം നീക്കം ചെയ്യണമെന്ന് നിര്ദേശിച്ചെങ്കിലും പ്രാബല്യത്തില് വന്നില്ല.
2009 ജൂലൈയില് സ്വവര്ഗ്ഗരതി നിയമവിധേയമാക്കി ദില്ലി ഹൈക്കോടതി വിധി പറഞ്ഞു. എന്നാല് നിയമത്തില് ഭേദഗതി കൊണ്ടുവരാന് അധികാരം പാര്ലമെന്റിനെന്ന് ചൂണ്ടിക്കാട്ടി 2013 ഡിസംബര് 11ന് ദില്ലി ഹൈക്കോടതി വിധി സുപ്രീം കോടതി റദ്ദാക്കി. ജസ്റ്റിസ് ജി.എസ്.സിംഗ്വി അധ്യക്ഷനായ കോടതിയുടെ ആ വിധി രാജ്യത്ത് വലിയ വിവാദങ്ങള്ക്ക് വഴിവെച്ചു. വിധി പുനഃപരിശോധിക്കണമെന്ന് ആവശ്യപ്പെട്ട് നല്കിയ ഹര്ജി സുപ്രീംകോടതി തള്ളുകയും ചെയ്തു.
അതിന് ശേഷം വന്ന തിരുത്തല് ഹര്ജിയില് കോടതി ഇതുവരെ തീരുമാനം എടുത്തിട്ടില്ല. പിന്നീട് 2016ല് 377ാം വകുപ്പിന്റെ ഭരണഘടന സാധുത ചോദ്യം ചെയ്ത് നിരവധി പുതിയ ഹര്ജികള് സുപ്രീംകോടതിക്ക് മുമ്പാകെ എത്തി. ഈ ഹര്ജികളിലാണ് ഇപ്പോള് വിധി വന്നിരിക്കുന്നത്.
നിലവില് 23 ലോക രാജ്യങ്ങളില് സ്വവര്ഗ്ഗ രതി നിയമവിധേയമാണ്. 72 രാജ്യങ്ങളില് കുറ്റകരവും. നിയമവിധേയമാക്കിയ രാജ്യങ്ങളൊക്കെ വികസിത വികസ്വര രാജ്യങ്ങളാണ്. 2011ല് ഐക്യരാഷ്ട്ര സഭയുടെ മനുഷ്യാവകാശ വിഭാഗം എല്ജിബിറ്റി സമൂഹത്തിന് നിയമപരിരക്ഷ ഉറപ്പാക്കാന് ലോക രാജ്യങ്ങളോട് അഭ്യര്ത്ഥിച്ചിരിന്നു