ബാലകൃഷ്ണപിള്ള-സ്കറിയ തോമസ് വിഭാഗങ്ങളുടെ ലയനനീക്കം പാളി;ചെയര്മാന് സ്ഥാനത്തെ ചൊല്ലി തര്ക്കം
തിരുവനന്തപുരം: ബാലകൃഷ്ണപ്പിള്ള -സ്കറിയാ തോമസ് വിഭാഗങ്ങളുടെ ലയനനീക്കം പാളി. ഇതോടെ ഇരു വിഭാഗങ്ങളും തമ്മില് ഒരുമിച്ച് നടത്താനിരുന്ന സംയുക്ത വാര്ത്താ സമ്മേളനം ഉപേക്ഷിച്ചു. ചെയര്മാന് സ്ഥാനത്തെ ചൊല്ലിയുണ്ടായ തര്ക്കത്തെ തുടര്ന്നാണ് ഇരു വിഭാഗങ്ങളും തമ്മിലുള്ള ലയനനീക്കം പാളിയത്.
മുഖ്യമന്ത്രിയിൽ നിന്നും എൽഡിഎഫ് നേതൃത്വത്തിൽ നിന്നും ഉറപ്പൊന്നും ലഭിക്കാതെ ഇരു പാർട്ടികളും ലയന തീയതി പ്രഖ്യാപിക്കില്ലെന്നാണ് സൂചന. എൽഡിഎഫ് വിഷയത്തിൽ ഇതുവരെ അഭിപ്രായം പറഞ്ഞിട്ടില്ല.
ഇടതുമുന്നണി വിപുലീകരിക്കുന്നതുമായി ബന്ധപ്പെട്ട ചർച്ചകൾ നടക്കവേ സ്കറിയാ തോമസും ആർ.ബാലകൃഷ്ണപിള്ളയും മുഖ്യമന്ത്രി പിണറായി വിജയനെ കഴിഞ്ഞദിവസം കണ്ടിരുന്നു. കേരള കോണ്ഗ്രസ്-സ്കറിയാ വിഭാഗം നിലവിൽ ഇടതുമുന്നണിയുടെ ഭാഗമാണ്. എന്നാൽ, കേരള കോണ്ഗ്രസ്-ബി ഉൾപ്പെടെയുള്ള ചില പാർട്ടികൾക്ക് ഇപ്പോഴും ഇടതുമുന്നണിയിൽ പ്രവേശനം ലഭിച്ചിട്ടില്ല.