രാഹുലിന്റെ ആലിംഗനം ആവശ്യമില്ലാത്തതായിരുന്നു;നിങ്ങള്‍ ഒന്നിച്ചാലും താമര വിരിയുക തന്നെ ചെയ്യും: മോദി
ഷാജഹാന്‍പൂര്‍: ബിജെപിക്കെതിരെ പ്രതിപക്ഷ പാര്‍ട്ടികള്‍ ഒന്നിക്കുന്നത് താമര വിരിയാന്‍ മാത്രമേ സഹായിക്കുകയുള്ളുവെന്ന് പ്രധാനമന്ത്രി നരേന്ദ്ര മോദി.അവിശ്വാസ പ്രമേയം എന്തിനാണെന്ന് താന്‍ പ്രതിപക്ഷത്തോട് ചോദിച്ചെന്നും മറുപടി ഇല്ലാതായ രാഹുല്‍ അപ്പോള്‍ തന്നെ ‘അനാവശ്യമായി’ ആശ്ളേഷിക്കുകയായിരുന്നെന്നും മോദി പറഞ്ഞു. ഉത്തര്‍പ്രദേശിലെ ഷാജഹാന്‍പൂരില്‍ സംഘടിപ്പിച്ച റാലിയില്‍ സംസാരിക്കുകയായിരുന്നു മോദി.
പ്രതിപക്ഷ പാര്‍ട്ടികള്‍ ഒന്നിച്ച്‌ നിന്നാല്‍ അത് താമരക്ക് കൂടുതല്‍ ഗുണകരമാവുമെന്നും അദ്ദേഹം വ്യക്തമാക്കി.ഇന്ത്യയിലെ ഒരു രാഷ്ട്രീയ പാര്‍ട്ടിയല്ല, മറിച്ച്‌ നിരവധി പാര്‍ട്ടികളാണ് ബി.ജെ.പിക്കെതിരെ ഒന്നിക്കുന്നത്. എന്നാല്‍, എത്ര പാര്‍ട്ടികള്‍ ഒന്നിച്ചാലും 2019ലെ പൊതുതിരഞ്ഞെടുപ്പില്‍ ബി.ജെ.പിയുടെ ചിഹ്നമായ താമര വിരിയുക തന്നെ ചെയ്യും. രാഷ്ട്രീയ പാര്‍ട്ടികള്‍ ബി.ജെ.പിക്കെതിരെ ഒരുമിച്ച്‌ അണിനിരക്കുന്നത് തങ്ങള്‍ അവസരമായാണ് കാണുന്നത് – മോദി പറഞ്ഞു.
പാര്‍ലമന്റിലെ അവിശ്വാസ പ്രമേയ ചര്‍ച്ചക്കിടയിലായിരുന്നു പ്രധാനമന്ത്രി നരേന്ദ്ര മോദിയെ സ്തബ്ധനാക്കി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ ആശ്ലേഷം.സ്വന്തം പ്രസംഗം തീര്‍ന്നയുടന്‍ രാഹുല്‍ എതിര്‍വശത്തേക്കു നടന്നുചെന്ന് പ്രധാനമന്ത്രിയെ കെട്ടിപ്പിടിക്കുകയായിരുന്നു.
