മെസ്സിയും കൂട്ടരും കുറിച്ചത് ലോകകപ്പ് ഫുട്ബോളിലെ നാണംകെട്ടൊരു ചരിത്രം
ലോകകപ്പ് ഗ്രൂപ്പ് ഡിയില് അര്ജന്റീനയ്ക്ക് ഞെട്ടിപ്പിക്കുന്ന തോല്വി. ക്രൊയേഷ്യയോട് എതിരില്ലാത്ത മൂന്ന് ഗോളുകള്ക്കാണ് നിലവിലെ റണ്ണറപ്പായ അര്ജന്റീന തകര്ന്നടിഞ്ഞത്. ആന്റേ റെബിക്ക്, ലൂക്കാ മോഡ്രിച്ച്, ഇവാന് റാകിടിച്ച് എന്നിവരാണ് ക്രൊയേഷ്യയുടെ ഗോളുകള് നേടിയത്. ഇതോടെ ലോകകപ്പില് അര്ജന്റീനയുടെ മുന്നോട്ടുള്ള വഴി തുലാസിലായി.
ഒഴിഞ്ഞ ഒന്നാം പകുതിക്കുശേഷമായിരുന്നു മൂന്ന് ഗോളുകളും. ആദ്യത്തേത് ഗോളി വില്ലി കബല്ലെറോയുടെ സമ്മാനം. അതില് താളം തെറ്റിയവരുടെ പോസ്റ്റിലേയ്ക്ക് പിന്നീട് സൂപ്പര്താരങ്ങളായ ലൂക്ക മോഡ്രിച്ചും ഇവാന് റാക്കിറ്റിച്ചും എണ്ണം പറഞ്ഞ രണ്ട് ഗോളുകള് അടിച്ചുകയറ്റുകയും ചെയ്തു.
ഈ തോല്വിയോടെ ലോകകപ്പില് അര്ജന്റീനയുടെ പ്രീക്വാര്ട്ടര് പ്രതീക്ഷകള് ത്രിശങ്കുവിലായിരിക്കുകയാണ്. രണ്ട് മത്സരങ്ങളില് നിന്ന് ഒരു പോയിന്റ് മാത്രമാണ് അവര്ക്കുള്ളത്. രണ്ട് കളികളും ജയിച്ച ക്രൊയേഷ്യ പ്രീക്വാര്ട്ടര് ഉറപ്പിച്ചു കഴിഞ്ഞു.
നൈജീരിയയുമായാണ് അര്ജന്റീനയുടെ അടുത്ത കളി. അതില് അവര് ജയിക്കുകയും ഐസ്ലന്ഡ് അടുത്ത രണ്ട് മത്സരങ്ങളും തോല്ക്കുകയോ സമനിലയിലാവുകയോ ചെയ്താല് മാത്രമേ അര്ജന്റീനയ്ക്ക് പ്രതീക്ഷയുള്ളൂ. ഇല്ലെങ്കില് 2002നുശേഷം ഒരിക്കല്ക്കൂടി ഒന്നാം റൗണ്ടില് തന്നെ തോറ്റു മടങ്ങേണ്ടിവരും അവര്ക്ക്.