കൊല്ലപ്പെട്ട മാധ്യമപ്രവര്ത്തക ഗൌരി ലങ്കേഷിനെ നായയോട് ഉപമിച്ച് പ്രമോദ് മുത്തലിക്; “ചില നായ്ക്കള് മരിക്കുമ്പോള് മോദി എന്തിന് പ്രതികരിക്കണം?”
18 June 2018
മാധ്യമപ്രവര്ത്തക ഗൌരി ലങ്കേഷ് വധത്തില് ശ്രീരാമസേന സംശയത്തിന്റെ മുനയില് നില്ക്കുമ്പോഴാണ് ശ്രീരാമസേന നേതാവ് പ്രമോദ് മുത്തലിക് വിവാദ പരാമര്ശം നടത്തിയിരിക്കുന്നത്. ബംഗളൂരുവിലെ പൊതുയോഗത്തിലാണ് മുത്തലിക് വിവാദ പരാമര്ശം നടത്തിയത്.
“കോണ്ഗ്രസ് ഭരണകാലത്ത് കര്ണാടകയിലും മഹാരാഷ്ട്രയിലും രണ്ട് വീതം കൊലപാതകങ്ങള് നടന്നു. കോണ്ഗ്രസ് സര്ക്കാരിനെ ആരും കുറ്റപ്പെടുത്തുന്നില്ല. പകരം അവര് ചോദിക്കുന്നത് ഗൌരി ലങ്കേഷ് വധത്തിലെ പ്രധാനമന്ത്രിയുടെ നിശബ്ദതയെ കുറിച്ചാണ്. കര്ണാടകയില് ചില നായ്ക്കള് മരിക്കുന്നതിന് മോദി എന്തിന് പ്രതികരിക്കണം?” എന്നാണ് മുത്തലിക് പൊതുയോഗത്തില് പ്രസംഗിച്ചത്.
എന്നാല് ഗൌരി ലങ്കേഷിനെ നായയോട് ഉപമിച്ചിട്ടില്ലെന്നും എല്ലാ മരണങ്ങളിലും മോദി പ്രതികരിക്കേണ്ടതില്ലെന്നാണ് ഉദ്ദേശിച്ചതെന്നും മുത്തലിക് പിന്നീട് വിശദീകരിച്ചു.