ദിലീപ് ബുദ്ധിമാനാണ്; ഇതുപോലൊരു വിഡ്ഢിത്തം കാണിക്കുമോയെന്ന് സംശയമാണെന്ന് മധു: ‘മലയാള സിനിമയില്‍ കാസ്റ്റിങ് കൗച്ച് പണ്ടുമുതലേയുണ്ട്’
കൊച്ചി: നടി ആക്രമിക്കപ്പെട്ട സംഭവത്തില്‍ ദിലീപിനെ പിന്തുണച്ച് നടന്‍ മധു. നടി ആക്രമിക്കപ്പെട്ട സംഭവം ആസൂത്രണം ചെയ്തത് ദിലീപാണെന്ന് താന്‍ കരുതുന്നില്ലെന്ന് മധു പറഞ്ഞു. നടി ആക്രമിക്കപ്പെട്ട കാര്യത്തെ കുറിച്ച് തനിക്ക് കൃത്യമായ വിവരങ്ങളൊന്നും അറിയില്ല.
ദിലീപ് ഇത് ആസൂത്രണം ചെയ്‌തെന്ന് താന്‍ കരുതുന്നില്ല. ദിലീപ് ബുദ്ധിമാനാണ്. അദ്ദേഹം ഇതുപോലൊരു വിഡ്ഢിത്തം കാണിക്കുമോ എന്ന കാര്യം തനിക്ക് സംശയമാണെന്നും മധു പറഞ്ഞു. നടിക്ക് ദുരനുഭവം ഉണ്ടായെന്നത് സത്യമാണ്. ഇതിന് പിന്നില്‍ ദിലീപാണോ എന്ന കാര്യത്തെ കുറിച്ച് തനിക്ക് ഉറപ്പില്ലെന്നാണ് പറഞ്ഞതെന്ന് അദ്ദേഹം പറഞ്ഞു.
അതേസമയം മലയാള സിനിമയില്‍ കാസ്റ്റിങ് കൗച്ച് പണ്ടുമുതലേയുള്ളതാണെന്നും മധു പറഞ്ഞു. മലയാളത്തില്‍ മാത്രമല്ല, മറ്റ് സിനിമാ മേഖലയിലും ഇത് ഉണ്ടായിരുന്നതാണെന്നും നടന്‍ മധു പറയുന്നു. ലൈംഗിക താല്‍പര്യത്തോടെയുള്ള ഇത്തരത്തിലുള്ള ബന്ധങ്ങള്‍ സിനിമയില്‍ മാത്രമല്ല എല്ലാ മേഖലയിലുമുള്ളതാണ്.
എല്ലാ സമൂഹത്തിലുമുണ്ടാകും. എന്ന് വെച്ച് അത് ആ സമൂഹത്തിന്റെ മുഴുവന്‍ സ്വഭാവമല്ലല്ലോ. അതുപോലെതന്നെയാണ് സിനിമയിലെ ഇത്തരം ബന്ധങ്ങളുമെന്ന് മധു പറഞ്ഞു. താരസംഘടനയായ ‘അമ്മ’യുടെ പ്രസിഡന്റായി ഇന്നസെന്റിന് പകരം മറ്റൊരാള്‍ തന്റെ മനസിലില്ല.
ഇന്നസെന്റ് തമാശ നടനാണെങ്കിലും നല്ല സംഘാടകനാണ്. എല്ലാവരുമായും നല്ല സുഹൃദ്ബന്ധവും അദ്ദേഹത്തിനുണ്ട്. അദ്ദേഹത്തിന് മാത്രമേ ഇത്ര നല്ല രീതിയില്‍ സംഘടനയെ മുന്നോട്ടുകൊണ്ടുപോകാന്‍ കഴിയൂ എന്നും മധു വ്യക്തമാക്കി.
