എന്തിനാണ് നടിമാരെ മാത്രം വേട്ടയാടുന്നത്?: അഭിമുഖത്തിനിടെ പൊട്ടിത്തെറിച്ച് അമലാ പോള്‍
അമലാ പോളും അരവിന്ദ് സാമിയും നായികാനായകന്‍മാരായി എത്തുന്ന ചിത്രമാണ് ഭാസ്‌കര്‍ ഒരു റാസ്‌ക്കല്‍. ചിത്രത്തിന്റെ പ്രൊമോഷന്റെ ഭാഗമായി കഴിഞ്ഞ ദിവസം അമല ഒരു തമിഴ് മാധ്യമത്തിന് അഭിമുഖം നല്‍കിയിരുന്നു. എന്നാല്‍ അഭിമുഖത്തിനിടയില്‍ ഒരു ചോദ്യം അമലയ്ക്ക് അത്ര പിടിച്ചില്ല.
ഇക്കാര്യത്തിലുള്ള നീരസം അമല പരസ്യമായി പ്രകടിപ്പിക്കുകയും ചെയ്തു. ഭാസ്‌കര്‍ ഒരു റാസ്‌ക്കലിലെ അമ്മ വേഷം നടി എന്ന നിലയില്‍ കരിയറിനെ ദോഷകരമായി ബാധിക്കില്ലേ എന്ന ചോദ്യമാണ് അമലയെ പ്രകോപിപ്പിച്ചത്.
അമ്മവേഷത്തിന്റെ പേരില്‍ നടിമാരെ മാത്രം വേട്ടയാടേണ്ടതില്ലെന്നായിരുന്നു അമലയുടെ മറുപടി. എന്തു കൊണ്ടാണ് ഇത്തരം ചോദ്യങ്ങള്‍ നടിമാരോടു മാത്രം ചോദിക്കുന്നതെന്ന് എനിക്ക് മനസ്സിലാകുന്നില്ല, എന്റെ സഹതാരം അരവിന്ദ് സാമി ഇതേ ചിത്രത്തില്‍ ഈ രണ്ടു കുട്ടികളുടെ പിതാവിന്റെ വേഷമല്ലേ ചെയ്യുന്നത്.
എന്തു കൊണ്ടാണ് അദ്ദേഹത്തിന്റെ നേര്‍ക്ക് ഇത്തരം ചോദ്യങ്ങള്‍ ഉയര്‍ന്നു വരാത്തത്. സൂര്യ പസങ്കയില്‍ രണ്ടു കുട്ടികളുടെ അച്ഛനായി വേഷമിട്ടു. അതു പോലെ തന്നെ വിജയ് സേതുപതിയും. ഇതൊരു സിനിമ മാത്രമാണ് , അതായത് ഒരു കലാരൂപം.
ആ രീതിയില്‍ നോക്കുമ്പോള്‍ ഈ ചോദ്യം തന്നെ അപ്രസക്തമാണ്. എന്തിനാണ് നടിമാരെ മാത്രം വേട്ടയാടുന്നത് എന്നും അമലപോള്‍ പറഞ്ഞു. മലയാളത്തില്‍ മമ്മൂട്ടിയും നയന്‍താരയും പ്രധാനവേഷങ്ങളിലെത്തിയ ഭാസ്‌കര്‍ ദ റാസ്‌ക്കലിന്റെ തമിഴ് പതിപ്പാണ് ഭാസ്‌കര്‍ ഒരു റാസ്‌ക്കല്‍. സിദ്ദിഖ് തന്നെയാണ് തിരക്കഥയും ഒരുക്കിയിരിക്കുന്നത്. ബേബി നൈനിക, മാസ്റ്റര്‍ രാഘവന്‍, സിദ്ദിഖ് (നടന്‍), സൂരി എന്നിവരാണ് ചിത്രത്തിലെ മറ്റു താരങ്ങള്‍.
