ഹൈദരാബാദില് നിന്ന് ലണ്ടനിലേക്ക് യാത്രക്കൊരുങ്ങി അച്ഛനും മകനും; പോകുന്നത് ബൈക്കില്
തെലങ്കാന: യാത്രകള് എന്നും ഒരു അനുഭവമാണ്. മനസിനെ ചെറുപ്പമാക്കാനും പ്രായത്തെ മറന്ന് കുട്ടികളെ പോലെ യാത്ര നടത്താനും സാധിക്കുന്നത് തന്നെ വലിയ കാര്യമാണ്. പറഞ്ഞുവരുന്നത് ഒരു അച്ഛന്റെയും മകന്റെയും യാത്രയെ കുറിച്ചാണ്. ഇവര് യാത്ര പോകുന്നത് ഹൈദരബാദില് നിന്ന് ലണ്ടനിലേക്കാണ്. അതും റോഡ് മാര്ഗം ബൈക്കില്. സമാധാനവും സന്തോഷവും സ്നേഹവും ലോകത്തിന് നല്കുക എന്നതാണ് ഈ യാത്രയുടെ ലക്ഷ്യം.
ഹൈദരാബാദില് ബിസിനസുകാരനായ ജി.വി.പ്രസാദും മകന് രക്ഷിതുമാണ് യാത്ര നടത്തുന്നത്. ഈ മാസം 24നാണ് യാത്ര തുടങ്ങുന്നത്. 55 ദിവസത്തിനുള്ളില് 16 രാജ്യങ്ങള് 17,000 കിലോമീറ്ററുകള് താണ്ടി ലണ്ടനിലെത്തുക എന്നതാണ് ഇവരുടെ ലക്ഷ്യം.
”ഞാനും എന്റെ മകന് രക്ഷിതും ഉള്പ്പെടെ ആറ് പേരാണ് ഇന്ത്യയില് നിന്ന് ലണ്ടനിലേക്കുള്ള യാത്രയില് പങ്കാളികളാകുന്നത്. ഈ മാസം 24ന് ഞാനും മകനും ഹൈദരാബാദില് നിന്ന് യാത്ര തിരിക്കും. മറ്റുള്ളവര് 28ന് ഗുവാഹത്തിയില് നിന്ന് ഞങ്ങള്ക്കൊപ്പം ചേരും. 16 രാജ്യങ്ങള് കടന്ന് 55 ദിവസത്തെ യാത്രക്ക് ശേഷം ലണ്ടനിലെത്തും”, ജി.വി.പ്രസാദ് പറയുന്നു.
ഒരു ലോകം, ഒരു കുടുംബം എന്ന സന്ദേശം പ്രോത്സാഹിപ്പിക്കുകയാണ് തങ്ങളുടെ യാത്രയുടെ ലക്ഷ്യമെന്നും അദ്ദേഹം പറഞ്ഞു.